Komisioni i Rithemelimit të PD- së ka përfunduar mbledhjen e nisur në orën 14.00 për përcaktimin e emrave të kandidatëve për “primaret” e 30 janar 2022. Tashmë, janë përcaktuar kandidatët për 6 bashkitë ku me 6 mars do të zhvillohen zgjedhje vendore të pjessshme. Demokratët e Shkodrës do të votojnë të dielën me 30 janar, në mes 6 emrave të vendosur në listë nga Komisioni i Rithemelimit të PD- së. Emrat e përzgjedhur jane:
1.Alfred KOÇOBASHI
2.Arben MALIQI
3.Astrit BUSHATI
4.Bardh SPAHIA
5.Irena SHESTANI SHALA
6.Irma ALUSHI KOPLIKU
Siç ishte paralajmëruar më herët, kryebashkiakja aktuale e Shkodrës Voltana Ademi, nuk do të jetë pjesë e këtyre “primareve” nga ku do të dalë kandidati për kryetar bashkie në kryeqendrën e Veriut. Në emrat e miratuar për Shkodrën, bie në sy tre kandidatë: Bushati, Spahia dhe Kopliku, kanë qenë ish- deputetë të PD- së. “Surpriza” mund të konsiderohen emrat e Alfred Koçobashi dhe Arben Maliqi. Ky i fundit, deri pak muajsh ka qenë drejtor i Akademisë “Vllaznia”. Astrit Bushati ka mbajtur edhe postin e kryetarit të PD- së Shkodër, teksa Irena Shestani është aktualisht nënkryetare e selisë blu shkodrane.
Pas përcaktimit të emrave zyrtarë, janë mësuar edhe qendrat e votimit ku demokratët e Shkodrës do të kenë mundësi të votojnë preferencën e tyre për kandidat për Bashkinë e Shkodrës me 6 mars 2022. Brenda mbrëmjes së nesërme, në përfundimit të “primareve”, pritet të mësohet emri i dytë, pas atij të Majlinda Angonit të PS- së për Bashkinë e Shkodrës. Mbetet të shihet kandidati që do të prezantojë PD-ja zyrtare e Bashës por edhe ndonjë subjekt tjetër politik që mund të bëhet pjesë e garës për Bashkinë e Shkodrës në zgjedhjet e pjesshme vendore.
Ndërkohë, kandidatët që do të garojnë në primare për Dibrën janë Behar Dema, ekonomist, Dafina Muda, psikologe dhe Premtim Riza, arsimtar. Ndërsa, për të kandiduar për të parin e Durrësit do të garojnë, Ardian Muka, inxhinier urbanist dhe Silvja Gjepali, IT.
Në Lushnje do të garojnë në primare, Arben Zaimi, jurist, Elton Bano, avokat, Eurion Iljazi, mësues i edukimit fizik dhe Indrit Qerimi po ashtu mësues i edukimit fizik. Për Rrogozhinën, kandidatët janë Eqerem Deliu, ekonomist, Hajrulla Tafa, mësues, Hekuran Xhani, mjek veterinar, Sokol Gosa, mësues histori-gjeografie , Vladimir Manushi, mjek dentist.
Dhe së fundmi, për Vorën do të garojnë inxhinieri Luan Gani dhe ekonomisti Lulzim Vrana.
