Irena Shestani Shala, është një nga 6 emrat e sjellë për votim në “primare” nga Komisioni i Rithemelimit i PD- së për Bashkinë e Shkodrës me 30 janar 2022. Sapo është mësuar kandidimi, ajo ka shpërndarë edhe thirrjen e parë, duke kërkuar mbështetjen me votë të demokratëve.
Në një publikim në Facebook, Irena Shestani Shala shkruan: Të dielën demokratët e Shkodrës votojnë në primare për të zgjedhur kandidatin për Bashkinë Shkodër. Anëtarësia e familjes sonë politike ka gjykuar që edhe unë të jem kandidate për t’i përfaqësuar. Me mirënjohje e kam pranuar këtë sfidë duke e gjykuar si detyrim ndaj demokratëve të thjeshtë, por jo vetëm.
Hyj në këtë sfidë për një arsye shumë të thjeshtë – për të bërë më të mirën për bashkëqytetarët e mi dhe për qytetin.
Sot bëj këtë hap për tu angazhuar për ndryshim; për një qytet më të mirë, më të zhvilluar; për një Shkodër që vend ka për të gjithë. Udhëtimi im politik ka qenë plot me emocione, por e di që udhëtimi është ende në fillim, se së bashku me demokratët do të gjejmë një mënyrë për të shërbyer, një mënyrë për të kontribuar në jetën publike këtu qytetin tonë dhe më gjerë.
Kjo do të jetë një garë e gjallë. Por ne paraqesim një vizion pozitiv – që ne i kuptojmë problemet me të cilat përballen njerëzit dhe se ne jemi këtu për të ndihmuar. Më e rëndësishmja, ne do të angazhohemi për rindërtimin e qytetit që shumë duam – jo siç ishte, por siç e meriton të jetë.
Primaret për qytetin tonë zhvillohen këtë të dielë me 30 Janar nga ora 08:00 deri në 17:00 në 3 qendra votimi: Pallati i Sportit, Bërdicë e Rrethina. Unë mezi pres që të më bashkoheni, mua dhe demokratëve e qëndrestarëve të Shkodrës, në fushatën tonë për të ringjallur qytetin tonë, shtëpinë tonë.
