Ndërkohë që fushata elektorale për zgjedhjet e 6 marsit ka filluar, Ambasadorja e Shteteve të Bashkuara të Amerikës, Yuri Kim i ka drejtuar disa pyetje kandidatëve për kryetar bashkie.
Me anë të një postimi në Facebook, Kim kërkon përgjigje se çfarë i premton votuesve një kandidat, i cili sponsorizohet nga dikush që nga SHBA është shpallur non grata.
“Pyetje për kandidatët: Nëse sponsori juaj kryesor është dikush i caktuar nga SHBA për korrupsion të konsiderueshëm, çfarë saktësisht po u premtoni votuesve? Kush do t’ju zotërojë nëse fitoni dhe çfarë do t’i detyroheni atyre? Çfarë duhet të presin shqiptarët? Çfarë duhet të presin SHBA?”, shkruan Yuri Kim.
Kujtojmë që në zgjedhjet e pjesshme të 6 marsit është angazhuar Sali Berisha, që mbështet kandidatët e koalicionit “Shtëpia e Lirisë”.
Por njëkohësisht edhe Vangjush Dako nga Partia Socialiste, i cili edhe pse non grata bën fushatë për Emiriana Sakon në Durrës.
