Dritan Demiraj, përpara se të dorëhiqej nga detyra e ministrit të Brendshëm, ka raportuar emrat e 33 punonjësve të Policisë në të gjitha nivelet, të cilët shpërdoruar detyrën dhe u përfshinë në fushatën elektorale.
Roli i Policisë në procesin zgjedhor dhe përfshirja e drejtuesve apo efektivëve të policisë në zgjedhje ka qenë një nga shqetësimet kryesore të opozitës dhe subjekteve të tjera politike. Kjo ishte edhe arsyeja që një nga institucionet kryesore që u kërkua të drejtohej nga një ministër teknik ishte Ministria e Brendshme.
Por edhe pse ishministri Dritan Demiraj në letrën e dorëheqjes vlerësoi bashkëpunimin që ka pasur me vartësit e tij, në raportin për zgjedhjet që zv.kryeministrja Ledina Mandija ka hartuar, konstatohet se drejtori i Policisë nuk paraqiti asnjë rast të përfshirjes së policisë në zgjedhje.
Sipas një shkrese të datës 19.06.2017 që mban firmën e drejtorit të Përgjithshëm të Policisë së Shtetit, Haki Çako, drejtuar zv.kryeministres Mandija informohet se nuk ka asnjë punonjës policie të përfshirë në procesin zgjedhor. Por të kundërtën ka konstatuar ishministri Demiraj në mbledhjen e Task-Forcës së datës 25 qershor.
Në këtë mbledhje, Demiraj ka folur me emra konkretë të drejtorëve të policisë që mbështesin subjekte të caktuara politike. Në raportin përfundimtar, Demiraj ka përcjellë emrat e 33 punonjësve të policisë të të gjitha niveleve që kanë shpërdoruar detyrën dhe janë përfshirë në procesin zgjedhor.
Në listën me emra të denoncuar nga ish-ministri Demiraj sqarohen edhe subjektet apo individët që punonjësit e policisë kanë mbështetur gjatë fushatës zgjedhore. Pjesë e emrave të denoncuar janë 11 shefa komisariatesh në të gjithë vendin, drejtorë policie dhe funksionarë të lartë në Policinë e Shtetit. /panorama/
