Komisioni Qendror i Zgjedhjeve zyrtarisht është nën administrimin e Ilirjan Celibashit. I zgjedhur nga Kuvendi, Celibashi ka marrë detyrën nga kryetari në detyrë Klement Zguri. Celibashi shoqërohet edhe nga nënkomisionerja Lealba Pelinku. Nga sot, institucioni i administrimit të zgjedhjeve do të quhet Komisioni Shtetëror i Zgjedhjeve.
Sipas Celibashit, sfida kryesore ngelet çështja e teknologjisë së informacionit. Kreu i KQZ, veçoi zgjedhjet e vitit 2005 dhe 2013, si të pranuara dhe me rrotacion kushtetues por tha se pavarësisht se faktori ndërkombëtar në përgjithësi, ka pasur vërejtje për zgjedhjet në Shqipëri, “kjo nuk është e gjitha një situatë kaq gri apo e zezë në rastin më të keq, ka pasur procese që dhe nga ndërkombëtarët kanë marrë vlerësim maksimal”.
Ilirjan Celibashi ka drejtuar edhe më parë institucionin e administrimit të zgjedhjeve, pasi ka qenë kryetar i KQZ-së për periudhën 2001 – 2006. Celibashi është një ndër njohësit më të mirë të legjislacionit zgjedhor, ai ka shërbyer si ministër i qeverisë Rama. Ndërkohë që prej vitesh, Ilirjan Celibashi ka ushtruar aktivitetin me studion e tij të avokatisë.
Ish- kryetari i KQZ-së, Klement Zguri i dorëzoi detyrën Komisionerit Shtetëror të votuar dhe në Kuvend me 106 vota pro.
