Sfida e skuadrës shkodrane në Conference League, ekskluzivitet i ekranit publik
RTSH rikthehet në futbollin elitar me transmetimin ekskluziv të sfidës së raundit të dytë të Konference League mes Vllaznisë dhe rumunëve të Universitatea Craiova. Duke nisur që prej orës 20:45 në RTSH 1 HD startojnë emocionet e duelit mes fituesve të Kupës së Shqipërisë dhe skuadrës së renditur në vendin e tretë të sezonit të kaluar në Rumani.
Një përballje emocionuese e hapur dhe shumë e rëndësishme për skuadrën e Mirel Josës që kërkon të shkruajë historinë pasi klubi më i vjetër i Shqipërisë nuk ka arritur asnjëherë të kualifikohet deri në raundin e tretë të kupave europiane.
Ekrani publik do të përcjellë ekskluzivisht 90 minutat e para që do të luhen në “Loro Borici” dhe do të vendosin shumë për të ardhmen e kësaj sfide që Josa dhe djemtë e tij po e përgatisin që prej më shumë se tre javësh.
RTSH konfirmon kështu një tjetër ndeshje ekzkluzive të skuadrave shqiptare në Europë duke vijuar traditën e viteve të kaluara ku ka sjellë për shqiptarët pa asnjë kosto shtesë sfida që kanë shkruar historinë dhe jo vetëm. Ora e takimit 20.45, ekrani publik ju fton të shijoni në cilësinë maksimale të zërit dhe figurës debutimin e shkodranëve në Europë.
