“Murlani” nis zyrtarisht “të fryjë” në futbollin shqiptar. Klubi i futbollit më i ri në qarkun e Shkodrës por me ambicje të forta në futbollin shqiptar, ka hedhur hapin e parë të rëndësishëm. KF Murlani i vëllezërve Përparim dhe Bledi Rraboshta, është regjistruar për pjesëmarrje në Kategorinë e Tretë të futbollit shqiptar, ashtu siç e parashikojnë rregulloret e FSHF-së.
Gjithçka është ndërtuar për të ecur drejt suksesit, i cili është i pashmangshëm. Ekipi është përforcuar edhe futbollistë të “Vllaznia B”, e cila është shkrirë pas rifillimit të kampionatit kombëtar të U-21. Synimi është i qartë, ngjitja në fund të sezonit një kategori më lart e për të vijuar kështu, pse jo një ditë edhe në Superiore.
Krijimi i ekipeve të moshave, për djem e për vajza, kompleksi i mrekullueshëm sportiv që tashmë është bërë “stacion” edhe i ekipeve kombëtare, Agroturizëm “Gardenland Resort” dhe mrekullitë që ai ofron vetëm 500 metër larg, janë një premisë për realizimin e objektivave edhe sportive, pasi kanë lënë shenjën e tyre në të gjitha aktivitetet ku vëllezërit Rraboshta janë përfshirë.
Që në hapat e parë e kemi paralajmëruar dhe ju kemi sugjeruar: Shënojeni këtë emër, shënojeni KF Murlani! Përherë e më shpesh do të dëgjoni të flitet për të. Rrugëtimi sapo ka nisur zyrtarisht. Suksese KF Murlani! /ShkodraWeb Media/
