“Kemi edhe 7 finale…”, trajneri i Vllaznisë Miloti: E para është nesër ndaj Partizanit…

Vllaznia dhe Partizani luajnë të shtunë në 16:45 në “Loro Boriçi”. Sfida vlen për javën e 30 të Superligës, me dy skuadrat që luftojnë për një vend në Kupat e Evropës.

Përpara medieve ka dalë zëvendëstrajneri i Vllaznisë, Auron Miloti. 47 vjeçari ka treguar se Da Silva do jetë jashtë, ndërsa ka treguar detaje edhe për largimin e Diagne.

“Janë shtatë finale dhe Vllaznia është e gatshme. Partizani është një nga ato. Duhet të japim maksimumin dhe të dalim me sukses. Nesër jemi të përgatitur për ndeshjen e parë, ekipi është i motivuar.

Bashkëpunimi me Plorin – Kemi njohje më herët, jam në një pozicion që s’mund të jap mendim për të. Ndeshjet e fundit janë shumë të forta, veç Tiranës që tani 99 përqind është kampion.

Dëmtimet – Veç Da Silvës, nesër janë të gjithë lojtarët.

Diagne – Është gjë e mbaruar. Më vjen keq për atë si futbollist, nuk donte të luante për ne.Ndoshta do kemi deklaratë nesër, nuk është më pjesë e ekipit, s’ka ardhur më.

Vendi i tretë ? Duam vendin e katërt sepse na çon direkt në Evropë. Janë shtatë finale siç thashë.

Biletat – Shpresoj që nesër tifozët të na japin një shtytje më të fortë si në Kupë. Sa më pak çmimi aq më mirë, janë drejtuesit që vendosin”, tha Miloti.