Shkruan në Facebook Gjenarin Kapcari, i sapo zgjedhur kryetar i PD Shkodër: Mbështetja dhe pjesëmarrja në procesin zgjedhor nga anëtarët e Partisë Demokratike të Shkodrës sot ishte e jashtëzakonshme. Ndihem shumë falenderues ndaj çdo anëtari që në rradhë të parë, na propozoi, mirëpriti dhe mbështeti si kandidatë në këtë garë brenda familjes sonë demokratike.
Falenderoj gjithashtu të gjithë kandidatët, të cilët përtej ambicjeve personale, vlerësuan pikësëpari njëri-tjetrin dhe respektuan garën demokratike.
Ndërsa për votuesit që më besuan mua drejtimin e Degës së Partisë Demokratike të Shkodrës, shpreh mirënjohjen e thellë për këtë privilegj dhe njëkohësisht përgjegjësi që mbart ky pozicion.
Me gjithë emocionin dhe entuziazmin që ndjej në këto momente, jam i ndërgjegjshëm për vështirësitë që mbart në vetvete ky pozicion, dhe sidomos, për situatën që ndodhet Partia Demokratike dhe për atë që përfaqëson kjo parti në këtë qytet.
Jam i bindur se vetëm bashkë me Ju, me secilin anëtar, simpatizant dhe qytetar të Shkodrës që beson tek vlerat demokratike, mund të sjellim një parti më të bashkuar, më të hapur dhe të aftë që të kontribuojë në jetën social-politike të qytetit tonë, Shkodrës.
Unë besoj!
