Ish- ministri i Brendshem kerkon ashpersim te denimeve per kultivuesit e droges

Ish-ministri i Brendshëm, Saimir Tahiri ka dorëzuar sot në Kryesinë e Kuvendit një projektligj për disa ndryshime në Kodin Penal. Duke folur për mediat, ai tha se i ka rikujtuar Parlamentit propozimet që ka bërë një vit më parë sa i takon dënimeve për kultivuesit dhe trafikuesit e kanabisit. Tahiri tha se “Shqipëria është i vetmi vend që jep të njëjtin dënim, si për një person që kapet me 1 gramë kanabis, ashtu edhe për dikë që kapet me tonelata”.

“Kam rikujtuar për Parlamentin propozimet që kam bërë në një vit më parë për disa ndryshime në Kodin Penal për kultivimin dhe trafikimin e drogës. Është vetëm Shqipëria vendi i cili dënon njësoj si atë që kapet me një gram hashash më atë që transportohen tonelata, por ashtu dënohen njëlloj ai që kultivon 10 rrënjë dhe ai që kultivon parcela të tëra.

Po kështu duhen edhe disa ndryshime edhe në Kodin Penal për rastet e dhunës në familje.

Shpresoj që parlamenti të dalë nga heshtja pas më shumë sesa një viti, dhe të marrin parasysh këto ndryshime pa pritur më shumë kohë. Ne si shoqëri nuk na falet që të lejojmë të ketë më shumë raste të tilla dhune jo vetëm ndaj njerëzve dhe kafshëve, por edhe të pengohet drejtësia, dhe të mos ndëshkohet korrupsioni. Këto duhet të marrin fund”, tha ish-ministri Tahiri. /balkanweb/