Rruga Rjoll- Shengjin, ka qenë një nga projektet më të mirëpritura për zhvillimin e turizmit dhe ndërlidhjen e dy plazheve ndër më të frekuentuarat në Lezhë dhe në Shkodër.
Punimet nisën me vrull dhe me ritëm, duke përcaktuar edhe afate. Në fakt, ka disa muaj që punimet janë ndërprerë. Të paktën në pjesën që po punohen nga drejtimi i Rrjollit në Shengjin.
Situata duket qartë nga disa foto që ka shpërndarë në rrjete sociale Qamil Xhurreta, ish- kryetar i Komunës Berdicë. Nuk duket këmbë punëtori apo mjeti motorik, duke krijuar idenë se ka muaj që nuk punohet.
“Duke patur parasysh rëndësinë e kësaj rruge, për të gjithë ata që zgjedhin për të vizituar dhe pushuar në plazhin e Velipojës por dhe lidhjen e një udhëtimi të shkurtër të banorëve të Velipojës me Lezhën dhe qytetet e tjera të Shqipërisë, përtej Lezhës, besuam dhe shpresuam se punimet e kësaj rruge do kishin avancuar edhe më shumë, por fatkeqësisht, punimet ishin pezulluar dhe “rruga” prej disa muajsh e bllokuar (shiko tabelën në foto) për shkak të problemeve të shumta që kanë shkaktuar hedhja poshtë e gurëve dhe inerteve të tjera; tregues këto, se projektimi i kësaj rruge (sipas mendimit tim) nuk ka pas një studim profesional të mirëmenduar.
Ne ecëm pikërisht deri atje ku mundëm të shkonim pa u rrezikuar, gjë për të cilën flasin edhe vetë pamjet që ne morëm përmes fotove që bëmë; sigurisht për t’i ndarë edhe me miqtë tonë të interesuar.”, shkruan ish- kryekomunari Xhurreta. Nuk është çudi që në prag të kësaj fushate zgjedhore, të nisin punimet. Të paktën për disa javë.
Distanca nga Shëngjini në Velipojë është 66.3 km dhe për ta përshkuar në kushtet që rruga ka sot, duhet rreth 1 orë e 30 minuta. Me me projektin e ri, distanca shkurtohet në 15 km dhe përshkimi i saj llogaritet të jetë jo më shumë se 20 minuta. Aksin që duhet të lidhte dy zonat turistike veriore kishte një kosto prej 3.8 miliardë lekë.
