EUROPOL ka zhvilluar një mega aksion të shtrirë në disa vende, me synim goditjen e grupeve të rrezikshme shqiptare. Ka qenë vetë kjo organizatë policore europiane, që ka bërë të ditur se aksioni është zhvilluar i koordinuar në tre vende dhe ku janë përfshirë 600 agjentë. 64 persona, të dyshuar anëtarë të mafies shqiptare janë vënë në pranga midis datave 3-5 prill. Sipas një njoftimi nga Europol, thuhet se ata u arrestuan gjatë një operacioni të shtrirë në Belgjikë, Francë e Holandë.
Të arrestuarit, sipas Europol besohet se kanë menaxhuar të paktën një duzinë plantacionesh të kanabisit të shpërndarë në të gjithë Belgjikën dhe në veri të Francës, ndërsa disa të tjerë dyshohet se janë përfshirë gjithashtu edhe në një rast të trafikimit të qenieve njerëzore në Francë.
Të arrestuarit akuzohen për një sërë veprash, si prodhimi dhe trafikimi i lëndëve narkotike, trafik i qenieve njerëzore, prostitucion dhe pastrim parash. 55 persona u arrestuan në Belgjikë, 7 në Holandë dhe 2 të tjerë në Francë.
Europol mbështeti hetimin që nga fillimi duke lehtësuar shkëmbimin e informacionit. Në ditën e veprimit, gjashtë ekspertë të Europolit u vendosën në vend në Belgjikë, Francë dhe Holandë për të lejuar shkëmbimin e informacionit në kohë reale. Gjatë aksionit janë bërë një sërë sekuestrimesh të aseteve kriminale.
“Krimi i organizuar shqiptar vazhdon të mbetet një shqetësim për vendet në Evropë. Në mars, ekspertët mbi krimin shqiptar u mblodhën në selinë qendrore të Europol në Hagë për të diskutuar mënyrat për t’i trajtuar më mirë këto klane të dhunshme të mafias. Operacionet e mëtejshme të këtij lloji pritet të ndodhin në të ardhmen e afërt” thuhet në njoftimin e Europolit.