FOTO – “Dita e Danubit” festohet në Malësi të Madhe, mundësi e mirë për promovimin e turizmit të zonës…

Me 29 qershor të çdo viti, 14 vende të pellgut të lumit Danub, festojnë së bashku një nga sistemet më të mëdha lumore të Europës, bashkë me banorët e saj dhe natyrën e egër në të cilën mbështeten. Kjo ditë, përveç 13 vendeve të tjera, kremtohet edhe në Qarkun e Shkodrës, më konkretisht në Vermosh të Malësisë së Madhe.

Lugina e Vermoshit, me dy degët e saj si Lëpusha dhe Grebeni, janë pjesë e bazenit të Danubit, si pjesë e shteteve të tjera ku shtrihet bazeni i këtij lumi. Ditën e sotme, është organizuar një aktivitet me pjesëmarrjen e Prefektes së Qarkut Shkodër Majlinda Angoni, kryebashkiakut të M.Madhe Tonin Marinaj, drejtues e përfaqësues të shoqërisë civile, banorë etj.

Aktiviteti është një mundësi e mirë për të promovuar territorin, vlerat e tij të padiskutueshme, duke patur në fokus turizimin. Në Malësi të Madhe, fokusi është dhe mbetet aktualisht tek turizmi malor ndërsa mundësitë janë edhe për atë liqenor, në brigjet e Liqenit të Shkodrës, ku vitet e fundit janë shtuar investimet private.