SPAK është lëshuar tashmë në sulm. Ndërsa po flitet për oficerë të lartë policie e zyrtarë të institucioneve të drejtësisë që bashkëpunojnë me krimin, SPAK po bën kërdinë mbi politikanët. Në faktë, këto 34 vite, pa më të voglin dyshim janë ata mëkatarët e mëdhenj. Ndryshe nga kriminelët që janë pasuruar përmes aktiviteteve të rrezikshme të jashtëligjshme- kryesiisht trafiqe, përgjithësisht politikanët apo “kriminelët me kollare” janë pasuruar përmes parave publike, praktikisht duke u futur dorën në xhep qytetarëve.
Por gjithë kjo pasuri e akumuluar në mëse 30 dekada, po vjen momenti që të zbulohet. Shumë politikanë në nivele të larta, po sajojnë divorcet me shpresën që pasuritë e paluajtshme por edhe ato në banka zyrtare e jo zyrtare, të kalojnë në favor të bashkëshortëve. Por ky është vetëm hapi i parë. Edhe nga bankat, paratë po zhduken me shpejtësi. Ato madje, as nuk po investohen. Rruga për të humbur çdo gjurmë nga bashkëshortët “e divorcuar” të parave të korrupsionit e abuzimit me pozitat e pushtetit, po investohen në para virtuale apo kripto monedha.
Edhe pse jo ligjor, biznesi i kripto monedhave është rritur ndjeshëm. Tashmë edhe rrjetet sociale janë përmbytur nga reklama të ndryshme, për fitime mijëra apo qindramijë euro që sigurohen gjoja lehtësisht nga “minierat”, siç quhen në gjuhën e rrjetit. Skema është shumë e thjeshtë. Paratë CASH, pasi dalin nga bankat, përmes “ndërmjetësuesve”, gjoja “investohen” në kripto monedha. Pra, po themi “investohen” 10 mijë euro dhe pas disa javëve apo muajve, në një llogari bankare depozitohen 100 mijë apo 1 milion euro, të gjitha këto të fituara përmes “investimit” minimal të bërë. Kështu, paratë kthehen “të pastra”, të pastruara nga qindra kompani online që kanë synim pikërisht t’ ju “mësojnë” si fitohen para lehtësisht përmes kriptomonedhave. Realiteti është krejt ndryshe: Paratë CASH investohen duke blerë kriptovaluta me kursin e momentit dhe pas një farë kohe, e njejta shumë nga virtuale, futet sërish në banka si CASH por e pastër, me burim të deklaruar fitimi. Madje, “kriminelët me kollare”, pranojnë edhe një marzh humbje 10- 20 përqind, në varësi të luhatjes së përditshme të kripto monadhave. Dhe nuk u kushton asgjë, pasi janë para pa mund, thjesht të vjedha nga publiku përmes korrupsionit e trafikut të influencave të pushtetit e lidhjeve okulte.
E njëjta gjë po ndodh edhe me pronat e paluajtshme. Ato po shiten nga “bashkëshortët e divorcuar”, paratë CASH po kthehen në para virtuale për tu rikthyer sërish në CASH, në llogari bankare, kryesisht jashtë Shqipërisë. Kështu, janë të shumtë politikanët që tashmë po investojnë në prona jashtë vendit, nga Europa në SHBA, Kanada e përtej. Edhe në emrat e tyre por edhe të “presta nome- ve” të besuar. Çdo gjë e justifikuar, pasi kripto monedhat janë jashtë kontrollit. Siç thamë më sipër, mund të deklarosh se ke investuar 10 mijë euro para 10 viteve dhe sot ato janë bërë 1 milion apo 10 milion euro.
Sigurisht, kjo është një skemë që tashmë e njohin dhe po e vëzhgojnë edhe SPAK e agjensitë e tjera ligjzbatuese. Vështirësia më e madhe si në çdo hetim, është gjetja e gjurmëve, vërtetimi i lëvizjeve për të krijuar prova. Është një aktivitet i paligjshëm në Shqipëri e shumë vende por është në ekspansion të madh, deri në diskutimin e heqjes fare nga qarkullimi të monedhave tradicionale apo kartave të kredit/ debitit. /ShkodraWeb/
