
Automjeti i një efektivi të policisë së Shkodrës është djegur mbrëmjen e 27 prillit, ndërsa dyshohet se ngjarja ka lidhje me detyrën e punonjësit të forcave operacionale. BurimeT bëjnë me dije se oficeri i policisë Dritan Turhani e kishte parkuar automjetin pranë banesës së tij në lagjen Perash të qytetit të Shkodrës.
Sapo ka parë që makina e tij është përfshirë nga flakët ai ka lajmëruar në sallën operative ndërsa kolegët e tij kanë filluar me hetimin e ngjarjes. Janë të paqarta arsyet e djegies së këtij mjeti ndërsa dyshohet se është një ngjarje e qëllimshme.
Oficeri Turhani ka deklaruar se nuk ka konflikte me askënd ndërsa policia dyshon se kjo ngjarje mund të ketë ardhur për shkak të detyrës.
NJOFTIMI I POLICISË
Më datë 28.04.2022, gjatë orëve të para të mëngjesit, në lagjen “Daniel Matlija”, Shkodër, në Rrugën e Koplikëve, ka rënë zjarr në mjetin tip “Benz”, në pronësi të shtetasit Dritan Turhani , 53 vjeç, banues në lagjen “Danjel Matlija”, Shkodër, me detyrë punonjës policie në DVP Shkodër. Mjeti ka qenë i parkuar pranë banesës së këtij shtetasi.
Vijojnë veprimet hetimore duke mbledhur çdo provë materiale dhe vlerësuar çdo informacion, si dhe duke bashkëpunuar ngushtë me ekspertët dhe Prokurorinë pranë Gjykatës së Rrethit Gjyqësor Shkodër, për përcaktimin e shkakut të djegies së mjetit dhe dokumentimin e plotë të ngjarjes.
Për bashkëpunime, publikime reklamash, njoftimesh në ShkodraWeb, mund të shkruani në SMS, Whatsapp, Viber +355 67 300 20 70 ose mail: info@shkodraweb.com në çdo kohë!