Shkencëtarët po akuzojnë industrinë e alkoolit se ka përhapur informacion të pasaktë për lidhjen mes alkoolit dhe kancerit. Studiuesit në Shkollën e Londrës për Higjenën dhe Mjekësinë Tropikale i kanë krahasuar veprimet e industrisë së alkoolit me përpjekjet që bëri industria e duhanit për të mohuar lidhjet mes pirjes së duhanit dhe kancerit në mushkëri.
Studiuesit analizuan informacionin e përfshirë në faqet e internetit të 28 organizatave në botë, që përfaqësojnë interesat e industrisë së alkoolit dhe arritën në përfundimin se shumica e tyre shtrembërojnë ose keqinterpretojnë provat për rrezikun që sjell alkooli për kancer, shkruan VOA.
“Ajo që do të shihni është se disa probleme shëndeti që lidhen me alkoolin përmenden në këto faqe, por nuk përmendet kanceri ose llojet specifike të kancerit, sidomos kanceri i gjirit apo i zorrës së trashë,” thotë Profesor Mark Petticrew.
Aleanca për Konsum të Përgjegjshëm Alkooli me seli në Uashington akuzohet se ka çorientuar publikun lidhur me rrezikun nga disa lloje kanceri, duke u përpjekur të përmendë rrezikun nga sëmundje të tjera.
Në një deklaratë për Zërin e Amerikës, Aleanca iu kundërvihet përfundimeve të shkencëtarëve duke thënë “Ne besojmë në rëndësinë e përhapjes së informatave shkencore dhe u përmbahemi konkluzioneve që kemi publikuar për alkoolin dhe shëndetin”.
Autorët e raportit krahasojnë veprimet e kësaj industrie me ato të kompanive të duhanit, të cilat për shumë kohë mohuan lidhjen mes pirjes së duhanit dhe kancerit.
“Në Britani rreth 4% e kancereve kosiderohen rezultat i konsumit të alkoolit. Mendoj se ajo që është e rendësishme është se rreziku është mjaft i ulët për ata që konsumojnë sasi të vogla. Por është fakt që këto kompani kanë përhapur informacion të shtrembëruar dhe kanë keqinterpretuar faktet,” thotë Profesor Petticrew.
Raporti thotë se nevojiten studime të reja urgjentisht për të parë nëse industria e alkoolit ka shtrembëruar informata edhe për rreziqe të tjera si nga sëmundjet kardio-vaskulare. /balkanweb/
