Është zbuluar dinamika e ngjarjes së rëndë në Rreshen të Mirditës, ku në një pritë humbi jetën Kastriot Reçi, 47 vjeç, ish- pronar i MPlus TV. Sipas Shqiptarja.com, nga ajo që kanë mundur të rindërtojnë hetuesit, autori ka mirëmenduar çdo veprim dhe ka njohur me detaje lëvizjet e 47- vjeçarit. I maskuar si grua, autori i është afruar një pallati në afërsi të Bar “Mirdita”, në pronësi të Reçit. Është ngjitur në katin e fundit të tij, në një banesë të braktisur dhe që sipas informacioneve jo zyrtare, i përkiste një personi me emrin Tonin Gjini. Ky person, ka humbur jetën në pritë pak kohë më parë, si pjesë e “larjes së hesapeve” në mes fiseve Reçi e Jaku në Mirditë. Sipas burimeve, autori ka hapur me forcë derën e apartamentit dhe ka hyrë brenda.
Autori duket se ka pritur pesë orë, teksa është shfaqur Kastriot Reçi, i shoqëruar nga vëllai i tij, të cilët do ti drejtoheshin lokalit në pronësi të tyre në Rreshen. Ish- pronari i MPlus TV, sipas burimeve, i kishte kufizuar mjaft lëvizjet e tij pasi vëllai i tij Gaspër Reçi humbi jetën në një pritë në Romë të Italisë. Ai ulej gjithmonë në një cep të lokalit të tij, për të qenë kështu i mbrojtur nga çdo e papritur. Autori, i cili sipas gjasave duhej të kishte aftësi në qitje, ka pritur momentin kur Reçi ka zbritur nga makina dhe po fliste në celular, teksa vëllai i tij ka hyrë në lokal. Me një pushkë me precizion të lartë, nga një distancë rreth 150- 200 metër, ai ka shenjestruar 47 vjeçarin në mes të shpatullave, ndërsa plumbi i ka përshkuar direkt zemrën. Dërgimi me urgjencë në spital i Reçit, ka qenë i pavlefshëm pasi ai ka ndërruar jetë në pak sekonda.
Ndërsa kishte ardhur në vendngjarje me makinë, autori është larguar në këmbë, duke lënë pas, në një nga katet e pallatit, edhe snaiperin me të cilin shenjestroi Reçin. Kamerat e sigurisë në zonë, kanë mundur të fiksojnë vetëm momentin kur autori i është afruar pallatit. Ai ka qenë i veshur sportiv dhe me të zeza, e ndërsa përveç snaiperit, është gjetur dhe një kapuç i zi, i cili është dërguar në laborator për të parë mbetjet biologjike.
Referuar të njëjtave burime mësohet se janë shoqëruar disa persona për t’u marrë në pyetje rreth kësaj ngjarjeje, por deri më tani nuk ka asnjë të ndaluar, si autor të dyshuar të ngjarjes së rëndë. Në pyetje janë marrë banorët e pallatit nga ku u shenjestrua Reçi, por kanë thënë se nuk kanë parë ndonjë lëvizje apo person të dyshimtë.
