![](https://www.shkodraweb.com/wp-content/uploads/2024/03/gjobe-zonja-2024-1024x537.jpg?x28643)
Nuk është hera e parë dhe sigurisht nuk do jetë as e fundit, kur policë të qarkullimit rrugor në Shkodër, përdorin një standard dyfish ndaj drejtuesve të mjeteve. Kemi denoncuar e do të vazhdojmë të denoncojmë raste që vijnë në redaksinë tonë sepse të gjithë duhet të trajtohen njësoj para ligjit, i cili në këtë rast, qytetarit i paraqitet me pamjen e një polici të qarkullimit rrugor.
Denoncimi më i fundit lidhet me një rast të dy ditëve më parë, në mes të qytetit të Shkodrës, në sheshin “Demokracia”. Është një person (nuk mund ta identifikojmë për arsye që kuptohen) që tregon për ShkodraWeb një ngjarje që lë shije vertetë të hidhur sesi punonjës policie, edhe në moshë të re, vazhdojnë me avazin e vjetër.
Rreth orës 16.00 të datës 21 mars 2024, në drejtimin e një makine të vogël Mercedez- Benz A Class, po bënte rreth rrotullimin e ish- “5 Heronjve”, për të marrë një porosi që do vinte nga Tirana për një event që do të organizohej në vijimësi. Kishte trafik në atë moment dhe ishte ndalur në vijat e bardha para hyrjes së ish- Muzeut (Kullës së Inglizit). Bie celulari dhe meqë ishte ndalur, e hap dhe i thotë personit që do të sillte porosinë, të ndalej në një vend të caktuar. Në atë moment, makina nis lëviz dhe pikërisht, teksa kishte thjesht celularin në dorë, drejtuesit të mjetit i bëjnë shenjë të ndalojë.
Sigurisht ndalet dhe i shpjegon policit se thjesht ktheu një përgjigje teksa makina ishte e ndalur sepse po priste një porosi. Polici leshverdhë nuk dëgjon nga ai vesh dhe thërret një polic tjetër, më i ri në moshë, i cili nis procedurat e gjobës, pavarësisht sqarimit që iu dha edhe atij. Pa kundërshtuar, drejtuesi i mjetit i jep dokumentacionin që kërkon polici, edhe pse jo i bindur për shkeljen pasi iu përgjigj celularit teksa makina ishte e ndalur.
Në atë moment, në krah futet me shpejtësi një makinë për të vijuar në drejtim të lagjes Rus. Polici leshverdhë i del perpara dhe e ndalon. Drejtuesi i mjetit, del vrik nga makina dhe i drejtohet me ton të lartë leshverdhit, duke i thënë se kishte punë, kishte 150 njerëz që e prisnin, të gjitha me ton të lartë. Madje, i thotë: Vendose gjobën sa të duash se ta paguaj, vetëm të iki… Leshverdhi thërret “komandatin” e tij, i cili ndërkohë kishte prerë gjobën dhe i drejtohet shoferit që kishte dalë nga makina: Futu në makinë së të vjen edhe era…(duke nënkuptuar për përdorim alkooli). Shoferi në fjalë, sigurisht ishte VIP, të paktën për Shkodrën.
Kaq rrëfen personi që u gjobit 7000 lekë, ndërsa shton se në paqsyrën e makinës pa leshverdhin dhe “komandatin” e tij të takoheshin përzemersisht me shoferin VIP, që sipas leshverdhit, i vinte era alkool. Fatmirësisht, e gjithë ngjarja ka ndodhur në një shesh të monitoruar me kamera publike dhe eprorët e leshverdhit dhe të “komandatit” të tij (siç e thërriste i pari), mund të verifikojnë çdo gjë, nëse duan.
Kodi Rrugor dhe Kodi Penal përcaktojnë qartë se çfarë ndodh në dy rastet, sidomos kur një shofer kapet në timon nën efektin e alkoolit, të paktën sipas asaj çfarë tha me zë të lartë polici leshverdhë. Sigurisht, kjo nuk është policia që duam, ndërkohë jemi të hapur për çdo denoncim në vijimësi sepse përballë ligjit të gjithë duhet të jenë të barabartë. Edhe pse shëmtuar, shteti në këtë rast, paraqitet me veshjen e një polici të qarkullimit rrugor.