Kryetarja e LSI, Monika Kryemadhi e kreu i grupit parlamentar, Petrit Vasili, kanë mbërritur në zyrën e kryedemokratit Lulzim Basha, pak minuta më parë.
Burime pranë PD bëjnë të ditur se vizita e Kryemadhit te Basha vjen për dakordësimin e qëndrimeve të opozitës lidhur me çështjen “Tahiri”. Kërkesa e prokurorisë për heqjen e imunitetit të deputetit socialist do shoqërohet në Kuvend seancën e të mërkurës me dy raporte, atë të maxhorancës dhe opozitës.
Opozita po harton raportin e saj për këtë çështje dhe do ta prezantojë në Kuvend. Dy forcat politike të opozitës kërkojnë heqjen e imunitetit të ish-ministrit të Brendshëm dhe vendosjen e tij përpara drejtësisë për akuzat e Prokurorisë si i lidhur me trafikun e drogës të grupit Habilaj. Edhe maxhoranca do ketë dokumentin e saj i cili sipas të gjitha parashikimeve dhe asaj që ka shprehur kryeministri Edi Rama, do rrëzojë pretendimet e organit të akuzës për mungesë provash.
