Shkruan në Facebook Emilia Koliqi, deputete e Qarkut Shkodër: Ditët e fundit të vitit 2021, rezervojnë për Shkodrën tregues aspak pozitivë. Sipas INSTAT, 5 bashkitë e Qarkut të Shkodrës, kanë përformancën më negative mes 12 qarqeve të Shqipërisë, si në treguesit e papunësisë, klimës së biznesit dhe emigracionit të lartë.
Papunësia, vazhdon të mbetet fenomeni më shqetësues, ku vetëm në Shkodër, janë 4000 punëkërkues aktivë të papunë. Në Shkodër fatkeqësisht nuk hapen vende pune sepse nuk ka investime nga shteti. Vetëm marketet punësojnë ndërsa edhe fasoneritë që punojnë për eksportin me material të porositësit, janë tkurrur.
Papunësia arrin në nivelin 45%, shifër e frikshme ndërsa kanë falimentuar edhe 655 biznese të vogla, duke rritur numrin e të papunëve. Këto shifra janë këmbanë alarmi për qeverinë, premtimet e saj boshe gjatë fushatave elektorale. “100 ditët e para” të kësaj qeverie, konfirmuan se edhe në këtë mandat të tretë, Shkodra do të jetë jashtë vemendjes së “Rama 3”.
Gjendja e rëndë që pranohet edhe nga institucionet shtetërore, duhet të sensibilizojë edhe vetë qytetarët. Ata duhet të organizohen, të mos protestojnë vetëm për këtë apo atë forcë politike. Pikë së pari të ngrejnë zërin për jetën e tyre dhe të familjeve shkodrane, për vështirësitë e thella ekonomike. Tashmë mijëra familje jetojnë edhe nën minimumin jetik të përcaktuar nga Banka Botërore, nuk kanë as 5 dollarë në ditë për frymë.