VOLEJBOLL/ I rrembeu Kupen, Partizani i “merr hakun” Vllaznise, e mund ne “Qazim Dervishi”

Vllaznia nuk ka arritur që ta thyejë edhe në kampionat Partizanin ashtu si në finalen e Kupës. Në ndeshjen hapëse të kampionatit u përballën Vllaznia, kampione në fuqi dhe fituese e Kupës, dhe Partizani, ekip që pretendon të rikthehet te titulli kampion. Ndryshe nga përballjet e sezonit të kaluar mes këtyre dy ekipeve dhe finales së Kupës, në këtë sfidë Vllaznia u dorëzua lehtësisht ndaj të kuqve. Edhe pse ndeshja u luajt në pallatin e sportit “Qazim Dervishi”, Vllaznia nuk arriti që ta fitojë ndeshjen. Skuadra e drejtuar nga Ylli Tomorri dominoi nga fillimi deri në fund pa e vënë në diskutim fitoren. Shkodranët, nga ana e tyre, u shfaqën jo dhe aq shumë kërkues ndaj ekipit kryeqytetas.

Setin e parë Partizani e fiton lehtësisht me një diferencë prej 13 pikësh, 25-12. Vllaznia tenton në setin e dytë, por sërish miqtë janë më të saktë dhe më të qetë në lojën e tyre, duke arritur që të fitojnë 25-17. As në setin e tretë nuk ka shumë histori dhe Partizani e fiton 25-18 dhe krejt ndeshjen 3-0.

Ky është një sinjal se pavarësisht triumfit në sezonin e kaluar dhe fitimit të Kupës, shkodranët nuk do ta kenë aspak të lehtë që të ruajnë këtë vit kurorën e kampiones. Gjithsesi e sigurt është se Vllaznia dhe Partizani do të jenë dy ekipet që do të dhurojnë emocione edhe këtë kampionat. /panoramasport/