Vllaznia ka vijuar edhe ditën e djeshme me procesin e rinovimit të kontratave me futbollistët që mbyllën sezonin e fundit me kuqeblutë. Pas firmës së mesfushorëve, Alsid Tafili dhe Arlind Kalaja, një tjetër lojtar ka arritur akordin me drejtuesit e klubit. Bëhet fjalë për mbrojtësin e krahut të majtë Antonio Marku. Ai ishte një ndër lojtarët që kanë kërkuar rishikimin e kontratave të tyre, nisur edhe nga kushtet që kanë pasur në kontratën ekzistuese. Marku kishte rënë parimisht dakord për të rinovuar dhe për këtë arsye prej ditësh i është bashkuar ekipit në stërvitje. Në seancat e fundit stërvitore mbrojtësi Marku ka qenë vizitor, pasi ka patur një problem në qafë, por shumë shpejt pritet që të bashkohet me grupin.
Ndërkohë, nga dita e djeshme ai është zyrtarisht pjesë e Vllaznisë edhe për sezonin 2017-2018. Procesi i rinovimit të kontratave do të vazhdojë edhe në ditët e ardhshme me lojtarët e tjerë titullarë.
Të rinjtë
Ditët e fundit të këtij muaji priten të jenë vendimtare për lojtarët, të cilët gjatë korrikut kanë patur kontakte nga klube të ndryshme europiane. Dihet që trajneri Cungu u ka dhënë ultimatum atyre që deri në fund të muajt kanë afat që të largohen, përndryshe nuk do të lejohen më tej.
Ndër emrat e përfolur kanë qenë: Çinari, Krymi dhe Pjeshka. Mirëpo, nga ajo që shikohet, të tre lojtarët duket se kanë preferuar që të heqin dorë nga pista e transferimit jashtë vendit dhe të vijojnë punën te Vllaznia. Nga ana tjetër, mesfushori Uendi Vecaj ka disa ditë që po stërvitet në Kroaci te skuadra e Dinamos së Zagrebit, kjo falë bashkëpunimit të vendosur mes klubit shkodran dhe gjigandëve kroat.
Provat
Vllaznia sërish nuk ka shans me lojtarët që mbërrijnë për provë. Pranë ekipit kanë ardhur deri tani katër emra, por asnjëri prej tyre nuk ka bindur drejtuesit e klubit. Tre nga këto lojtarë kanë ardhur nga vendet fqinje, dy nga Mali i Zi dhe një nga Serbia.
Ndërsa kosovari i qendrës së mesfushës, Ramadani, që është larguar pas seancës së parë stërvitore, po pritet që të vihet sërish në provë te kuqeblutë. Javën që vjen Vllaznia ka parashikuar të zhvendoset në Mal të Zi, ku do të zhvillojë fazën përgatitore në qytetin malor të Beranes.
