Pas vendimit të parlamentit holandez që kërkon pezullimin e përkohshëm të vizave për Shqipërinë, qeveria holandeze thotë se tani për tani, politika e vizave për të udhëtuar në Holandë nuk ka ndryshuar.
Sipas një deklarate të shpërndarë nga ambasada e Holandës në Shqipëri, thuhet se qeveria holandeze po shqyrton hapat që do të ndërmarrë.
Në deklaratë thuhet se për qytetarët shqiptarë me pasaportë biometrike nuk kërkohet vizë për një qëndrim në zonën Shengen për një periudhë maksimale prej 90 ditësh brenda një periudhe prej 180 ditësh.
Deklarata e plotë:
Në përgjigje të lajmeve në media në lidhje me politikën e vizave për udhëtimin për në Hollandë:
Qeverisë holandeze i është kërkuar nga parlamenti i saj të kërkojë pezullimin e mekanizmit të rregjimit pa viza. Për momentin, qeveria është duke shqyrtuar hapat të cilat duhet të ndërmarrë.
Për momentin, politika e vizave për udhëtimin drejt Holandës nuk ka ndryshuar. Nënshtetasit shqiptarë, mbajtës të një pashaporte biometrike, mund të udhëtojnë në zonën Shengen pa viza për maksimumi 90 ditë brenda një periudhe 180 ditësh.
