Vllaznia ka zhvilluar sot ndeshjen e parë pas largimit të papritur të trajnerit maqedonas Mirsad Jonuz. Kuqeblutë kanë patur një transfertë jo të lehtë në Laç me ekipin vendas, i cili pas barazimit me Teutën një javë më parë, ishte i etur për pikë e fitore.
Ndeshja nuk ka filluar aspak mirë për kuqeblutë. Një rreshtim i gabuar në mbrojtje ka sjellë golin e parë për vendasit në minutën e 17- të me autor Markun. Ai nuk e ka patur të vështirë të shënojë teksa është lënë pa mbuluar nga prapavija shkodrane.
Është dashur të kalonin 17 minuta të tjera që Laçi të gjente edhe golin e dytë. Përsëri probleme me mbrojtjen, e cila nuk spastron si duhet zonën e rreptësisë. Topi largohet disai nga zona por përfundon në këmbët e Deliut, i cili godet dhe shënon të dytin për vendasit.
Me këtë rezultat mbyllet pjesa e parë e ndeshjes. Vllaznia duket se zgjohet me fillimin e saj dhe nuk vonon të vijë goli. Zogaj merr një top në zonën e Laçit, driblon një mbrojtës dhe shënon golin e parë për kuqeblutë në minutën e 50- të, 5 minuta pasi hyri si zëvendësues.
Por nuk do të mbaronte me kaq kjo ndeshje, duke dhuruar edhe gola të tjerë. Në minutën e 79- të, pas disa rasteve të mira të Vllaznisë me Junior e Likën, shënojnë vendasit përsëri me Ignjatovic. Nuk vonon përgjigja e shkodranëve me Likën vetëm pak minuta më vonë, duke rihapur sërish ndeshjen. Por kjo zgjat vetëm 60 sekonda. Prengaj shënon golin e katërt për laçjanët, duke mbyllur praktikisht ndeshjen. Por ka akoma kohë edhe për një gol të pestë në shtesë e lojës për vendasit nga Rapo, duke fiksuar rezultatin e thellë 5 – 2 për Laçin. Një humbje e parashikueshme kjo për Vllazninë, e cila në fakt kalohet në renditje nga Bylis që mundi Teutën e Martinit, teksa Partizani është mundur në Tranë nga Kukësi.
Është urgjente që kuqeblutë të dalin nga situata e papritur ku ranë me largimin e trajnerit maqedonas Mirsad Jonuz për të bërë mbyllje sa më dinjtoze të sezonit të çuditshëm. /ShkodraWeb Media/
Laçi: Stazhila, Trokthi, Ignjatovic, Selmani, Turkaj, Rapo, Deliu, Teco, Marku, Xhixha, Greca. Trajner: Armando Cungu.
Vllaznia: Efremov, Gligorov, Adili, Malota, Gurishta, Krymi, Kruja, Bardulla (Zogaj 46′), Sidorenco (Lika 46′), Shtubina, Zhunior. Trajner: Safet Osja
Gjyqtar: Klajdi Kola