“Të shohim përpara”, kështu shprehet sponsori Alban Xhaferi pas fitores me Laçin që nuk i mundësoi titullin Vllaznisë. Edhe pse nuk e kishte parë ndeshjen, ai nënvizoi se ka patur diçka në ndeshjen e Teutës me Apoloninë, sidomos me dy kartonat e kuq për vendasit.
Ai e ka konsideruar Vllazninë fituese në të gjitha drejtimet në këtë sezon. Xhaferi ka falenderuar futbollistët, stafin drejtues dhe veçanërisht kryebashkiaken ademi që i dha jetë bashkëpunimit, duke qenë një ndihmesë e madhe në arritjen e objektivave.
“Vllaznia e madhe po rikthehet, jemi në Kupat e Europës”, kujton Xhaferi i cili duket se ka gati edhe planet për të ardhmen. Ai i beson sërish Brdariç- it, një pjesë të futbollistëve që janë akoma nën kontratë, por duke qenë në pritje të përfundimit të privatizimit të klubit në ankandin që po zhvillohet.
Kupa e Shqipërisë është e mundshme dhe Alban Xhaferi mendon se “shkojmë për ta çu kupën”, pra për ta fituar atë në ndeshjen finale me Skenderbeun. Në një linjë me sponsorin është edhe kapiteni Erdenis Gurishta.
Ndërkohë, Alban Xhaferi tregon edhe pengun e këtij sezoni. “Tifozët”, thotë ai shkurt. Megjithatë, ai shpreson që ata të rikthehen në stadium për të mbështetur Vllazninë, edhe në Kupat e Europës. Xhaferi falenderon organet kompetente që sot hapën dyert e stadiumit për të lejuar tifozët në ndeshjen me Laçin. /ShkodraWeb/
