Me lot në sy e flamurin kuqeblu mbi arkivol, Edmond Spatari, tifozi i veçantë i Vllaznisë u përcoll për në banesën e fundit. Mondi siç e njohin mbarë tifozëria, u nda nga jeta një ditë më parë në moshën 54. vjeçare pas një sëmundje që e mundoi prej kohësh. Familjarë, të afërm, miq, tifozë i dhanë lamtumirën e fundit. Ish- presidenti i Vllaznisë Valter Fushaj e kujton si një tifoz që dha shpirtin në stadium.
Miqtë e Mondit, tifozët që ishin pranë tij për vite e vite me radhë ndjejnë keqardhje për ndarjen nga jeta para kohe të tij. Historitë me Mondin janë të pafunde në stadiumet e Shqipërisë duke ndjekur Vllazninë.
Ra në sy mungesa e drejtuesve apo futbollistëve aktualë të KF Vllaznia, për të cilët, në ditë të mira dhe të këqija, ishte në mbështetje të pakursyer të tyre. Jo vetëm kaq. Klubi kuqeblu nuk ishte kujtuar as edhe për një kurorë të thjeshtë, në respekt të kryetifozit të vet, në ditën e fundit në këtë botë.
ShkodraWeb i shpreh ngushëllimet familjarëve, të afërmve dhe miqve të Mondit, tifozët të përjetshëm i cili edhe i sëmurë në ditët e fundit të jetës nuk mungoi në stadium sepse Vllaznia ishte e gjithë jeta e tij!