Ditën e sotme, një foto me pamje të brendshme të një avioni të Air Albania, ka bërë xhiron e mediave. Ata që e kishin siguruar dhe shpërndarë foton, aludonin se ishte një avion që ka realizuar riatdhesimin e shqiptarëve nga Frankfurti i Gjermanisë. Në foto dallohej qartë se në avion, kishte mjaft njerëz, çuditërisht edhe qëndronin në këmbë si në një autobus urban. Respektimi i masave të distancimit social, i domosdoshëm edhe në udhëtimet e riatdhesimit, nuk respektohej, të paktën nga sa tregonte fotoja.
Sapo ky lajm është publikuar edhe nga ShkodraWeb Media, ka patur reagime nga persona që thonë se ishin vetë pasagjerë në këtë avion që udhëtonte nga Gjermania drejt Rinasit në Tiranë. Për të vertetuar se ishin pasagjerë, ata kanë dërguar foto dhe video exclusive, madje edhe vetë biletën e udhëtimit, të cilat ne po i demonstrojmë më poshtë.
Qytetari, i cili jeton në Gjermani dhe është nga Shkodra, thotë se fotoja e publikuar është e momentin kur avioni ulet në tokën shqiptare dhe pasagjerët po bëheshin gati të linin mjetin fluturues. Ndërsa gjatë udhëtimit, gjithmonë sipas qytetarit të ka dërguar foto e video në ShkodraWeb Media, situata ka qenë krejt normale, me respektim të masave të sigurisë, siç shihen edhe vetë stjuardesat. Ai shton se ka për qëllim vetëm të tregojë të vertetën dhe jo të përfshihet në ndonjë polemikë apo debat të mundshëm. /ShkodraWeb Media/
