Detaje të reja kanë dalë nga ngjarja e rëndë në Malësinë e Madhe ku ende janë të zhdukuar tre të rinjtë, Vilson Çutaj, Klement Pepaj dhe Danjel Pepaj. Burime jo zyrtare bëjnë me dije se Policia po heton në dy pista kryesore. E para është ajo e ekzekutimit të Vilson Çutaj dhe Klement Pepajt nga Danjel Pepaj, pas një sherri për zhdukjen e 50 kg me kanabis,sasie cila ishte kultivuar në parcelat e tyre.
Ndërsa pista e dytë është ajo e pengmarrjes. Grupit hetimor dyshon se tre të rinjtë mund të jenë marrë peng nga një person, ose grup personash, për sasinë e kabanisit së zhdukur. Ndërkohë, deklaratat kontradiktore të familjarëve kanë bërë “lëmsh” grupin hetimor, pasi ato ndryshojnë nga dita në ditë.
Kjo ngjarje ka sjellë edhe ngujimin e babait të Danjel Pepajt, Rrok Pepaj, në banesën e tij, pasi familjarët e Vilson Çutajt i kanë kërkuar atij trupat e dy të rinjve.
Po kështu, Rrok Pepaj është shoqëruar së fundmi në Polici, pasi dyshohet se pas ngjarjes së rëndë djali i tij ka shkuar në banesë dhe ka ndërruar rrobat dhe më pas është larguar.
