Ditën e djeshme në Velipojë është hapur zyrtarisht sezoni turistik veror. U organizuar një sërë eventesh që kulmuan me një koncert në orët e vona të mbrëmjes.
Me nxehjen e kohës, janë të shumtë vizitorët në Velipojë. Shijojnë detin, rërën por edhe diellin, pavarësisht se këto ditë, herë del dhe herë fshihet. Ka edhe nga ata që janë vëzhgues të vëmendshëm.
Pedagogu i Universitetit të Shkodrës, Ervis Krymbi, ndër frekuentuesit e rregullt të Velipojës në çdo stinë, ka evidentuar një tabelë sinjalizuese rrugore, e cila pavarësisht se sot është njësi administrative e Bashkisë Shkodër, emërtohet “komunë”.
“Velipoja është njësi funksionale e bashkisë Shkodër, e cila sjell plot të ardhura në buxhet. Në bazë të reformës territoriale të 2015 nga komunë është kthyer në Njësi Administrative e bashkisë Shkodër. Kështu uroj të shtoni shërbimet për Velipojën, e të hiqen tabelat që nuk kanë lidhje më me aspektin administrativ të Velipojës. Gëzuar sezonin turistik e më shumë vëmendje turizmit e Velipojës!”, shkruan pedagogu Krymbi.
Shpresojmë që personat përgjegjës ta riparojnë këtë tabelë, duke drejtuar të interesuarit drejt ndërtesës së njësisë administrative Velipojë sepse komunën Velipojë, mund ta gjejnë vetëm në Google nga 2015- a.
