Qeveria “Rama 2” është mbledhur sërish sot në orën 11:00 në një takim 2-ditor informal për të vendosur piketat e drejtimit të vendit për 4 vitet e ardhshme. Pas takimit në Vlorë, ashtu si katër vite më parë, Rama zgjodhi sërish Qarkun e Shkodrës, për takimin e dytë. Gazetari Seand Nikshiqi raporton për BalkanWeb se takimi i Ramës me ministrat e rinj, përfshirë edhe Gramoz Ruçin, e Taulant Ballën po mbahet në ambientet e kompleksit “Fishta” në Velipojë.
BalkanWeb mëson gjithashtu se takimi i ditës së parë, pritet të zgjasë deri në orën 22:00 të mbrëmjes së kësaj të mërkure, ndërsa deri më tani, askush prej anëtarëve të rinj të kabinetit dhe as vetë kryeministri nuk kanë dhënë detaje për mbledhjen. Ndërsa ajo vijon të jetë hermetikë për mediat, ashtu si në Llogara, Rama theu heshtjen përmes një postimi në llogarinë e tij në “Facebook”, ku tregoi edhe vendimin e dytë të qeverisë, që i ngarkon institucioneve të sigurojnë vetë certifikatat për qytetarët që aplikojnë për arsye të ndryshme.
Pas mbledhjes së parë informale me kabinetin e rij në Llogara, kryeministri Rama bëri publik vendimin e parë të qeverisë së re: shpalljen e vitit 2018 si Viti i Skënderbeut, që përkon me 550-vjetorin e vdekjes së heroit Kombëtar.
