SURPRIZA/ Ish- ministrja e PD-se mund te zgjidhet ne kabinetin e ri Rama

Dy ditë na ndajnë nga qeveria e re që do të vendoset, e cila është etiketuar tashmë si “Rama 2”. Zëra të shumtë kanë folur për ndryshime që do të kenë ministritë por edhe suprizat që vetë Rama si gjithmonë i ka dëshirë. Këtë të dielë pritet që të emërohen ministrat e rinj si dhe të përcaktohen ministritë e qeverisë.

Por, supriza e kësaj qeveria duket se do të jetë politikani që do të drejtojë Ministrinë e Diasporës, edhe pse një fakt i tillë ende nuk është vërtetuar. Rama është munduar të jetë sa më shumë diskret në lidhje me lajmet që qarkullojnë me qeverinë e re që do të formojë, duke lënë që pasnesër të suprizojë ose ndoshta të lërë me gojë hapur shumë elementë politikë.

Rama lajmëroi dje edhe krijimin e një ministrie të re, asaj të Diasporës, të cilës i kushtoi një pjesë të mirë të fjalimit para ambasadorëve.

“Dua t’ju informoj që në funksion të këtij aspekti themelor të kësaj qasjeje të re, qeveria e re do të ketë dhe një ministër shteti ekskluzivisht për shqiptarët jashtë atdheut”, tha Rama.

Pikërisht për këtë post të ri dje në ambientet politike qarkullonin disa kandidatura dhe mes tyre edhe ish-ministrja e Integrimit dhe ish-deputetja e PD, Majlinda Bregu, e cila përveçse një njohëse e mirë e proceseve integruese, ka edhe njohje me vlerë në nivele të larta të KE dhe PE çka e dëshmoi edhe me negociatat e fundit për krizën politike për bojkotin e zgjedhjeve nga PD. Vlerësimi i Ramës për punën e Bregut vjen që gjatë mandatit të kaluar qeverisës, ku ish-ministrja e PD mbante postin e kryetares së Komisionit të Integrimit.

Në momente kyçe për fatin e hapjes së negociatave në mbledhjet e përbashkëta Shqipëri–BE, Bregu ka kërkuar gjithmonë hapjen sa më parë të këtyre negociatave.

Burimet shtuan se kandidatura e Bregut është në diskutim dhe mund të realizohet me qëllim për të treguar hapje ndaj opozitës dhe pikërisht në një nga postet që ka të bëjë me raportet me jashtë. Para një viti mediat kanë shkruar se Bregu ka marrë një propozim për rolin e kryenegociatores së Shqipërisë me BE pas hapjes së mundshme të negociatave. Por me shtyrjen e tyre edhe propozimi nuk pati rastin të vërtetohej.