Anetari i Partise Demokratike në Kurbin Van Rica, i cili qëlloi me armë zjarri pas nje konflikti ne selinë e kësaj force poltike do të hetohet me masen sigurisë detyrim paraqitje. Ai u njoh këtë të premte me masen e sirgurisë në Gjykatën e Kurbinit dhe prokuroria Matilda Fetahu, kishte kërkuar që të qëndrojë në burg 45-dite për veprat penale “Mbajtja pa leje e armëve, armëve shpërthyese dhe municionit”, “Kanosja” dhe “Prishja e qetësisë publike”.
Por pasi dëgjoi palet gjyqtari Olti Skrame, vendosi që ta lirojë nga qelia 53-vjeçarin Van Rica, me argumentin se armen e kishte patur me leje, duke qenë se ishte përgjegjes i një policie private. Ndërkohë vetë i akuzuari nuk ka folur në lidhje me ngjarjen, por vetem avokati i tij Pashk Gjaci i cili pretendoj se klienti i tij ishte i pajisur me armë me leje dhe kemi të bëjmë vetem me prishje të qetësisë publike.
Ngjarja ndodhi mbrëmjen e së hënës gjatë një takimi të Partisë Demokratike ku Van Rica i cili mbështeste kandidatin Edmond Shkoza kishte kërkuar anëtarësimin e disa simpatizantëve, por kjo është kundërshtuar nga nënkryetari i degës së Partisë Demokratike Kastriot Marku me pretendimin se kishte përfunduar afati i anëtarësimeve.
Në debat e sipër Van Rica ka qëlluar me armë zjarri pistoletë në korridoret e zyrave të Partisë Demokratike dhe më pas është larguar, por fatmirësisht nuk pati persona të lënduar.
