Gjatë fjalës së mbajtur para mbështetësve të opozitës në Elbasan, kreu demokrat Lulzim Basha tha se falë protestave, në Shqipëri u parandalua ajo që ai e cilëson vendosjen e “duvakut” të vendeve aziatike ku sundohet pa ligj. Sipas Bashës, kryeministri Edi Rama frymëzohet prej këtyre vendeve, duke mos preferuar të specifikonte ndonjërin prej tyre.
“Po të mos ishte për bashkimin tonë, sot Shqipëria do të bëhej gati të vendoste duvakun e vendeve aziatike që i nënshtrohen dhunës, sundimit pa ligj, autokratëve dhe diktatorëve. Këta sheh Edi Rama dhe frymëzohet, çfarë kanë ata më shumë se sa unë. Këta sheh Edi Rama. Ta blejë, ta përçajë apo ta largojë nga vendi kur nuk i bindet. Edi Rama i ke bërë hesapet pa popullin, hesapet pa popullin të nxjerrin me këpucë të kuqe. Ju bëj thirrje ta vazhdojmë ditë për ditë betejën tonë. Nuk ka kauzë më të drejtë”, theksoi Basha.
Kreu demokrat tha se nuk do të ketë zgjedhje më 30 qershor me Edi Ramën kryeministër.
“Beteja vazhdon. Në 30 qershor ne nuk do lejojmë krimin të diktojë zgjedhjet në Shqipëri. Zgjedhje pa opozitën nuk mund të ketë, proces farsë zgjedhor nuk do të ketë. Në 30 qershor do të caktojmë një datë tjetër për zgjedhjet e parakohshme, nën kujdesin e një qeverie tranzitore pa Ramën kryeministër”, shtoi ai.
Ai ftoi qytetarët që të bashkohen në protestën e radhës kombëtare, atë të 11 majit. “Derisa ky popull dhe qytetarët e këtij vendi të gëzojnë të njëjtat të drejta dhe të kemi një qeveri që mbron qytetarët shqiptarë, derisa në Shqipëri ti jepet fund standardeve të dyfishta, beteja do të vazhdojë orë e minutë. Ne do të luftojmë në çdo qytet e fshat. Ju ftoj ta kulmojë këtë betejë të shtunë në 11 maj. Deri në 11 maj armata e lirisë dhe demokracisë është në këmbë për të mos bërë asnjë hap pas, por vetëm hapa para drejt fitores së Shqipërisë si gjithë Evropa”, u shpreh ai.
