U prezantua me shumë bujë në verën e vitit të kaluar kur po me bujë, nisën punimet. Shiroka do të bëhej një mrekulli turistike, të paktën sipas asaj që deklarohej por edhe sipas fotove e video të postuara edhe nga vetë kryeministri Edi Rama. Punimet filluan, pavarësisht pakënaqësisë së banorëve e bisneseve që vjet u penalizuan jo pak nga punimet. Shiroka është shumë pranë qytetit të Shkodrës dhe normalisht, është mjaft e frekuentueshme. Foto që mund të shikoni më poshtë, të lënë me “gojë hapur”.
Dukej se gjithcka po ecte normalisht teksa nisën edhe problemet e para. Nuk pati asgjë zyrtare, por konstatohej nga banorët e Shirokës, pronarët e bisneseve por edhe mediat se diçka nuk po shkonte në këtë projekt. Ritmi i punimeve ra dhe përherë e më pak shiheshin mjete dhe punëtorë që punonin. Mungesa e ritmit deri në ndërprerje të punimeve, ishte shumë shpesh edhe temë e kronikave televizive, portaleve etj.
Nën zë flitej se është problem fondesh. Kompania prestixhore “Albtiefbau” nisi punimet dhe i avancoi ato me paratë e veta. Kjo, me shpresën se do të nisnin të paguheshin për punën e bërë, në bazë të situacioneve dhe asaj çfarë ishte rënë dakort. Mesa duket kjo nuk ka ndodhur, ose nuk ka ndodhur rregullisht. Mësohet se tashmë sipërmarrësi ka tërhequr mjetet por edhe punëtorët nga ky kantier. Sipas burimeve, janë mbi tre muaj punë e papaguar nga Fondi i Zhvillimit Shqiptar. Në këto kushte, për të mos thelluar më shumë humbjet por edhe për ti përdorur mjetet në kantiere të tjera, kompania ka vendosur të mbyllë kantierin përkohësisht.
Përsëri jemi në prag të seyonit turistik. Përsëri Shiroka vazhdon të jetë ndër më të preferuarat e Shkodranëve. Punimet e nisura dhe të lëna në mes, kanë dëmtuar rrugën, kanë dëmtuar trotuaret dhe kanë lënë pas pluhur e gurë. Me këtë imazh do të priten shkodranët që do ta zgjedhin atë, por edhe turistët e huaj që në stinën e verës nuk janë të paktë. deri kur FZHSH apo qeveria të gjejë paratë dhe të paguajë kompaninë sipërmarrëse, të shkosh në Shirokë mundesh, por jo për të pushuar e çlodhur… /ShkodraWeb/
