Seanca e pare e Kuvendit te ri, a do ta drejtoje Berisha seancen e pare…?!

Seanca e parë parlamentare për legjislaturën e re do të mblidhet më 9 shtator, në orën 10.00. Presidenti Ilir Meta dekretoi këtë datë për parlamentin e ri të dalë pas zgjedhjeve të 25 qershorit dhe që i hap kështu rrugë nisjes së legjislaturës së 9. Pikërisht data 9 shtator, shënon mbarimin e mandatit të parlamentit aktual për mbledhjen e deputeteve të rinj. Sipas Rregullores së parlamentit, në datën 9 shtator, e vetmja detyrë e deputeteve është ngritja e komisionit për verifikimin e mandateve, i cili ka dy ditë afat për të verifikuar mandatet e deputetëve të rinj. Në seancën pasardhëse, deputetët bëjnë betimin dhe zgjedhin Kryetarin e Kuvendit, i cili sipas vendimit të maxhorancës socialiste do të jetë Gramoz Ruçi. Ditën e konstituimit të parlamentit, Presidenti i Republikës Ilir Meta dekreton kryeministrin e Shqipërisë, Edi Ramën, i cili rikthehet në parlament për të shpallur programin e qeverisë. Në 2013 debati për programin e qeverisë Rama ka zgjatur dy ditë, e nëse edhe do të ndiqet i njëjti skenar më 15 shtator, Shqipëria do të ketë në detyrë qeverinë e re.

Gjithashtu, Kushtetuta parashikon që kjo seancë e parë të drejtohet nga deputeti më i vjetër, i cili është ish-kryeministri Sali Berisha. Burime për “Gazeta Shqiptare” pranë ish- kryeministrit bëjnë me dije se as këtë herë z.Berisha nuk do të pranojë drejtimin e seancës së parë plenare, gjithsesi mbetet për t’u parë deri me datën 9 shtator. Kujtojmë që katër vite më parë, drejtimin e seancës e mori Namik Dokle, si deputeti më i vjetër pas Berishës. Mbetet për t’u parë se çfarë do të ndodhë në seancën e 9 shtatorit.

Parlamenti i ri, i dalë nga 25 qershori, këtë herë ka si deputetë Edi Ramën, Sali Berishën dhe kreun e opozitës Lulzim Basha, por nuk ka Ilir Metën. /shqiptarja.com/