Kryeministri Edi Rama deklaroi ditën e sotme se të dielën do të shpallet qeveria e re “Rama 2”. Në një takim me ambasadorët e Shqipërisë në vendet e BE-së dhe NATO-s, kreu i qeverisë pohoi se pas shpalljes së kabinetet qeveritar, ministri Bushati do të takohet me ambasadorët.
“Pas shpalljes së Qeverisë së re të dielën do t’i kërkoj Ministrit të ri që të bëjë një takim me ju për të biseduar në funksion të rolit që do marrë menjëherë shërbimi i Jashtëm në ekonominë e vendit”, pohoi Rama.
Mes të tjerash ai bëri të ditur se në këtë mandat qeverisës do të krihet edhe një ministri e re, siç është Ministra e Shtetit. “Në funksion të kësaj, qeveria jonë do ketë një ministri shteti për shqiptarët jashtë atdheut. Ministria e Jashtme ka nevojë për një krah shumë të fortë me një fuqi të plotë. Bashkëpunimi me diasporën lë për të dëshiruar”, tha Rama.
Ashtu edhe siç u bë e ditur më herët, Asambleja e Partisë Socialiste do të mblidhet të dielën më 27 gusht për prezantimin e raporteve të grupeve të punës të ngritura nga kryetari i partisë Edi Rama pas zgjedhjeve, ku mendohet se do të zgjidhet edhe qeveria e re.
