Edi Rama nuk i ndahet Vlorës. Njësoj si 4 vjet më parë, kryeministri ka thirrur në një takim informal kabinetin e ri qeveritar, pasi e bëri atë publik një ditë më parë. Ndaj, ashtu siç ishte parashikuar, mbledhja nisi në orën 17:00, ndërsa ajo po mbahet në një prej restoranteve në zonën e Llogarasë.
Takimin e paralajmëroi nga mbledhja e asamblesë kryesocialisti, ku mesa duket nuk dëshiron të humbasë kohë, por të nisë menjëherë punën. Burimet raportuan për Marsela Karapançon, gazetaren e ‘News 24’ se në takim do të jetë i gjithë kabineti i sapoemëruar, kryetari sapozgjedhur i parlamentit, Gramoz Ruci dhe kryetari i grupit parlamentar Taulant Balla.
Në fokus do të jetë finalizimi i punës për programin e qeverisë, draft-planin e ministrive që do t’i paraqiten grupit në mbledhjet e para. Po ashtu, me kryetarin e asamblesë dhe të grupit parlamentar do të finalizohen propozimet për ekipin drejtues të grupit dhe të komisioneve parlamentare.
Kryeministri Edi Rama nga Asambleja e PS-së dje konfirmoi atë çka u përfol më herët. Tashmë qeveria do të ketë një kabinet më të vogël, duke shkrirë kështu disa ministri.
“Struktura e re e qeverisë do ndryshojë. Defektet e mandatit të parë, por edhe sfidave të këtij mandati çojnë që na duhet një qeveri më e vogël dhe më bashkëvepruese”, tha Rama.
Gazetarja Karapanco ka siguruar për ‘BalkanWeb’ pikat e diskutimit dy ditor që do të mbajë sot dhe nesër Rama me ministrat e rinj.
PIKAT
1-Ndarja të kompetencave
2-Rrëgullimi i 104 drejtorive në varësi
3-Shperndarja e godinave ministrore
4-Pergatitja e kuadrit ligjor që bën të mundur zbatimin e skemës së re qeverisëse
5-Hartimi i programit qeverisës që miratohet në parlament së bashku me votëbesimin e qeverisë.
6-Drejtimi i 5 komisioneve parlamentare nga PS (5 kryetarët dhe shpërndarja e anëtarëve).
