Në rrugët kryesore të qytetit të Shkodres janë shfaqur pas një mungese disa mujore postblloqet e improvizuara dhe të kombinuara të Policise së Shtetit. Janë aksione rutinë të herëpashershme nga policia, duke u pozicionuar në pika të ndryshme dhe duke kontrolluar mjetet motorike për dokumentacion apo persona të shpallur në kërkim.
Ndalohen mjete të dyshimta ose për te cilat ka informacion. Kontrollohen edhe për armëmbajtje pa leje, konsum alkoli apo lëndëve të tjera si drogat e ndryshme. Aksione të tilla organizohen periodikisht në qytete të ndryshme në bazë të një plani të Policisë së Shtetit, ndërsa grupet që stacionohen përbëhen nga policë qarkullimi, Policia e Rendit dhe FNSH në disa raste.
Ndërkohë, bëhet me dije se mbrëmjen e sotme, është vënë në pranga një person, i identifikuar paraprakisht si Balil Murataj 43 vjeç. Ai terrorizoi zonën e Bardhajve në njësinë Rrethina të Bashkisë Shkodër gjatë gjithë pasdites së sotme, teksa ne ecje e sipër me automjetin e tij, qëlloi në ajër me armë zjarri herë pas here. Pas sinjalizimeve nga banorët policia vendore e Shkodrës beri arrestimin e tij.
Njoftimi i policisë
Shkodër
Qëllonte me armë zjarri, në ajër, duke terrorizuar banorët e zonës, falë reagimit në kohë të Policisë, kapet dhe vihet në pranga 43-vjeçari.
Në ndihmë të Policisë vendore shkuan edhe 2 grupe të RENEA-s dhe të FNSh Shkodër.
Policia gjeti dhe sekuestroi në cilësinë e provës materiale, armën e zjarrit kalashnikov dhe municion luftarak.
Shërbimet e Komisariatit të Policisë Shkodër, pas marrjes së njoftimit se në fshatin Bardhaj ishin dëgjuar të shtëna me armë zjarri, kanë shkuar menjëherë në adresën e dhënë, bashkë me shërbime të FNSh Shkodër, për të verifikuar rastin.
Nga verifikimet rezultoi se 43-vjeçari B. M. kishte qëlluar me armë zjarri, në ajër, duke terrorizuar banorët.
Në ndihmë të Policisë lokale shkuan dhe dy grupe të RENEA-s.
Si rezultat i kontrolleve në territorin e fshatit, pas disa orësh, u kap shtetasi B. M., 43 vjeç, që kishte qëlluar në ajër, me armë zjarri.
Gjatë kontrollit fizik, këtij shtetasi i është gjetur një sasi municioni luftarak, që u sekuestrua në cilësinë e provës materiale, bashkë me armën e zjarrit automatik që ai e kishte fshehur në pyll sapo ka parë që ishte rrethuar nga shërbimet e Policisë.
Në vijim të veprimeve procedurale, shtetasi B. M., 43 vjeç, banues në fshatin Bardhaj, u arrestua në flagrancë.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
