Koordinatori politik i Qarkut të Shkodrës për PD- në Helidon Bushati, ka reaguar lidhur me rritjen e tarifës për depozitimin e mbetjeve në landfillin e Bushatit nga Këshilli Bashkiak i Vau- Dejësit. Përmes një publikimi në faqen e tij zyrtare në Facebook, Bushati shkruan:
“Vidh e vidh, nuk kanë të ngopur! 26 milion lekë të reja në vit do merren nga xhepat tanë për interesa okulte korruptive. Sot, banorët e bashkive të qarkut Shkodër dhe Lezhë, janë vënë në dijeni për një vendim të paligjshëm dhe abuziv të ndërmarrë nga Shoqëria Ndërkomunale Bushat dhe Këshilli i Bashkisë Vau i Dejës.
Papritur, pa asnjë konsultim transparent, apo një analizë të mirfilltë teknike dhe ekonomike, është vendosur për rritjen me 43% të tarifës për depozitimin e mbetjeve urbane në landfill, duke “harruar” se ky akt abuziv bie ndesh me ligjin për Vetëqeverisjen Vendore dhe Financat, por mbi të gjitha rëndon drejtëpërdrejtë në xhepat e banorëve dhe bizneseve të dy qarqeve Shkodër dhe Lezhë.
Kjo është fytyra e vërtetë e Rilindjes, pazaret e fundit në prag të fushatës elektorale. Në betejën tonë nuk jemi përballë një forcë poltike, por përballë një grupi të strukturuar politiko-kriminal.”, përfundon shënimin e tij Bushati.
Ditën e sotme, ishte kryebashkiakja Voltana Ademi që denoncoi atë që e cilësoi “aferë korruptive”, ndërsa reagimi i qytetares së parë të Shkodrës u pasua edhe nga reagime të tjera si ai i ish- deputetit Bardh Spahia, ish- kryetares së Këshillit të Qarkut Shkodër Greta Bardeli dhe tashmë edhe e koordinatorit politik të Qarkut Shkodër për PD- në Helidon Bushati.
