Shkodra ishte thjesht e vetëm pikënisja. Çmontimi dhe sekuestrimi i kamerave të jashtëligjshme në rrugët e sheshet e këtij qyteti, u pasua me të njëjtën procedurë në shumë qytete të tjera të vendit. Sot, edhe në një qytet në dukje i qetë apo jo problematik në dukje si Pogradeci. 32 vite nga ndryshimi i sistemit, shqiptarët mësuan se nga syri “vigjilent” i Sigurimit të Shtetit, kanë qenë në monitorim të pandërprerë nga syri i kamerave.
As më pak e as më shumë një shtëpi “Big Brother”. Mesa duket, edhe frymëzimi i kryeministrit për projektin satelitor “Albania 1” dhe “Albania 2”, duket se ka marrë shkas pikërisht nga ky koncept. Sepse Edi Rama e di mirë se nuk ka asgjë më të rëndësishme se informacioni. Në fillim sigurimi i tij, më pas përpunimi dhe në fund përdorimi për interesa të caktuara.
Jeta e çdo shqiptari ka qenë në sytë e dikujt. Sipas Policisë së Shtetit, na kanë vëzhguar pandërprerë grupet kriminale apo “të fortët”. E kanë ditur në çdo moment jo vetëm ku janë e çfarë po bëjnë rivalët, por edhe qytetarët e thjeshtë, hallexhinjtë që përplasen çdo ditë me problemet e jetesës, pa e vrarë mëndjen se janë nën vëzhgimin e një “syri” që u di edhe “lugët që kanë në shtëpi”.
Me gjasë, i gjithë ky informacion është i grumbulluar, i regjistruar në servera dhe i pashkatërrueshëm as nga Policia e Shtetit. Ajo mjaftohet me idenë se nuk gjenden IP- të nga janë kontrolluar kamerat. Sigurisht, është gënjeshtër. Genjeshtër që demontohet lehtë nga një person që ka në dorë minimalisht në smartphone apo telefon inteligjent. Çdo IP dedektohet, ç’kodohet sado e fshehtë të jetë. I gjendet lehtë burimi dhe terminali. Madje, sipas IP- ve, mund të arrish deri në derën apo telefonin e atij që monitoron kamerat.
Çfarë ndodhë me informacionin e akumuluar dhe në duart e grupeve kriminale? Mund të përdoret në çdo moment, për arsye e qëllime nga më t ndryshmet. Sigurisht, jo në kuptimin pozitiv. Nga shantazhet deri tek gjobëvëniet. Policia e Shtetit si gjithmonë, paralajmëron për aksionet e veta që shkelësit e ligjit të shpëtojnë. Përndryshe, çmontimi dhe sekuestrimi i kamerave të jashtëligjshme, do të bëhej pasi të mësohej nga kush janë vendosur dhe nga ku monitorohen. Por edhe sot, mund të sigurohet ky informacion. Pyesni specialistë IT!
Teknologjia e sotme, mundëson edhe kamera të lëvizshme. Pak a shumë, të ngjashme me ato të parkimit që kanë shumë makina edhe aktualisht. Po atyre si mund ti bëhet? Edhe ato monitorojnë, sigurojnë informacion që mund të përdoret për qëllime dashakeqe. Por edhe ato, policia mund të identifikojë. Fillimisht nëse ka dëshirë, më pas nëse ka mjetet e duhura në dispozicion.
Mbi të gjitha, një pyetje “1 milion dollarëshe”: Në këtë shtëpi të formatit “Big Brother”, kush është “Vëllai i Madh” që na vëzhgon të gjithëve? Apo janë disa të tillë sipas lagjeve e qyteteve? Një të paktën e njohin tashmë të gjithë. Është kryeministri Edi Rama me “Albania 1” dhe “Albania 2”. Për çfarë do ta përdorë informacionin e grumbulluar? Ai e ka thënë për një Zot e di! Kujdes, Big Brother po ju vëzhgon! /Nga Blerti DELIJA/
