“Ndryshimi do ketë ‘vulën’ e votës së komunitetit të malësorëve në Shkodër”, Tonin Marinaj në mbështetje të kandidates Angoni

Kryebashkiaku i Malësisë së Madhe Tonin Marinaj është i bindur se “ndryshimi do ketë ‘vulën’ e votës së komunitetit të malësorëve në Shkodër”. Këtë ai e ka shprehur në një takim në fshatin Dobraç të Shkodrës me malësorë nga Malësia e madhe që kanë të drejtë vote me 6 mars 2022 në Bashkinë e Shkodrës.

Marinaj është shprehur se nuk do të ketë ndonjë xhelozi si kryebashkiak i Malësisë së Madhe, nëse me fitoren e Angonit si kryetare e Bashkisë Shkodër, investimet e qeverisë Rama do të përqendroheshin në Shkodër.

Takimi, ishte në kuadër të fushatës zgjedhore, ku Marinaj është angazhuar në krah të ish- prefektes Majlinda Angoni, kandidate për kryebashkiake e Shkodrës në zgjedhjet e pjesshme vendore të 6 marsit.

Nga ana e saj, kandidatja socialiste Majlinda Angoni ka falenderuar për mbështetjen e këtij komuniteti, duke theksuar se do të ishte një kryebashkiake për të gjithë, nëse do të votohet me 6 mars 2022.

Në këtë takim, ishte i pranishëm edhe nënprefekti i Malësisë së Madhe Hysen Hysaj, ndërsa takimi është hapur nga intelektuali Rasim Smakaj. Në përfundim të takimit, të gjithë ishin të bindur se vota e malësorëve në Shkodër dhe në rrethinat e saj, do të sjellë ndryshimin në Shkodër.