Këngëtari i mirënjohur i muzikës popullore Bujar Qamili është ndaluar sot nga policia rrugore, ndërsa nxitonte për të mbërritur në Report TV, ku ishte i ftuar në emisionin “Rreze Dielli”.
Mjeshtri i Madh e pranoi në studion e emisionit se kishte nxituar duke tejkaluar paksa limitet e shpejtësisë për shkak të trafikut të rënduar në disa pjesë të rrugës, veçanërisht në Fushë Krujë dhe aksin Milot-Lezhë.
“Edhe pse u nisa herët prapë u vonova, e biles më ndaloi policia se nxitova. Por i thashë policit ‘më fal’ se jam në orën 9 në transmetim direkt.”, ka rrëfyer Qamili.
Fatmirësisht punonjësi i policisë rrugore thjesht e kishte këshilluar të mos tejkalonte limitin e lejuar të shpejtësisë dhe këngëtari shpëtoi paq pa u gjobitur. Këngëtari ka shfrytëzuar praninë e tij në emision për t’i bërë apel ministrit, që ta rregullojnë këtë aks rrugor, në mënyrë që distanca Shkodër-Tiranë të jetë sa më e shkurtër.
Mjeshtri i Madh i muzikës popullore ishte i ftuar sot në emisionin “Rreze Dielli” për të folur mbi koncertin e tij recital që mbajti në 20 maj në Pallatin e Koncerteve në Tiranë por edhe përgatitjet që po bën për një këngë të re.
Të nderuar lexues dhe vizitorë të portalit tonë! Reklamat që shfaqen, mundësojnë që ShkodraWeb të vazhdojë të jetë e lirë dhe e pandikuar në përcjelljen e të vertetës. Faleminderit nëse i klikoni!
