Nuk e ka kaluar paq përfundimin e ndeshjes Laçi-Tirana (1-3), bilbili kryesor i takimit Enea Jorgji, së bashku me disa prej anësorëve dhe delegatin e FSHF-së Çela. “Panorama Sport” ka mësuar se arbitri i FIFA-s përveç se është goditur në fushën e lojës dhe doli prej andej i shoqëruar nga forcat e policisë, është ndeshur me një pritë rrugës duke u kthyer në qytetin e tij pas ndeshjes.
Mësohet nga Panorama sport se nga ana e mbështetësve të “Kastriotit”, Enea Jorgjit i kanë ngritur pritë në autostradë. Kanë kërkuar nga gjyqtari të hapë krahun dhe i kanë ndaluar makinën duke kërkuar llogari për ndeshjen e Tiranës me Laçin.
Por, ka qenë delegati i FSHF-së, siç duket i shqetësuar nga kjo “pritë” në mes të rrugës, që ka lajmëruar gjithë zyrtarët e FSHF-së, si dhe uniformat blu. Menjëherë pas telefonatës, duket se “trimat e rrugës” janë larguar, ndërkohë që policia ka marrë përsipër të shoqërojë deri në vendin e duhur Enea Jorgjin dhe arbitrat e tjerë që udhëtonin me të, rrugës së kthimit në shtëpi.
Nuk është incidenti i parë i dhunës ndaj gjyqtarëve. Dhe dhuna, nuk është vetëm me mjete të forta, gurë e shishe. Këtë radhë, dhuna ishte psikologjike.
