![](https://www.shkodraweb.com/wp-content/uploads/2024/05/IMG_9289-1024x536.jpeg?x28643)
Mbledhja e radhës e Këshillit Bashkiak Shkodër, ka zgjedhur sekretaren e re të këtij institucioni. Pikë e parë e rendit të ditës, ishte zgjedhja e sekretarit të ri të Këshillit Bashkiak, vend vakant pasi sekretari Denis Lesha, ka kaluar në një detyrë tjetër si pjesë e administratës bashkiake. Sekretare e re Këshillit Bashkiak të Shkodrës, do të jetë Sabina Danaj, e cila ka marrë 30 vota pro dhe 11 abstenime.
Mandatin e kaluar, 2019- 2023, Danaj ka qenë pjesë e Këshillit Bashkiak, ndërsa tashmë pritet të rikthehet, duke qenë sekretare e tij.
Sabina Danaj, e lindur në vitin 1990, mban titullin MSC në drejtësi “E drejta kushtetuese dhe administrative”. Ajo nga 1 maj 2018, mban pozicionin e juristes e më pas, kryetares së Degës së Sherbimeve Mbështetëse dhe Çeshtjeve Juridike në Ndërmarrjen “Trajtimi i Studentëve” sh.a. Shkodër dhe juristes së Spitalin Rajonal të Shkodrës.
Më përpara ka punuar në OSHEE si specialiste KNK, në biznesin privat si specialiste kërkimi e asistente- notere. Në nenin 57 të ligjit organik 139/2015, përcaktohet se sekretari zgjidhet nga Këshilli Bashkiak me propozim të kryetarit të tij.
Neni 57
Sekretari i këshillit bashkiak
1. Sekretari i këshillit emërohet dhe shkarkohet nga këshilli bashkiak, në bazë të propozimit të kryetarit të këshillit, me shumicën e votave të të gjithë anëtarëve të këshillit. Shkarkimi i sekretarit mund të propozohet edhe nga 1/3 e anëtarëve të këshillit.
2. Sekretari i këshillit bashkiak është përgjegjës për:
a) mbajtjen e dokumenteve zyrtare të këshillit;
b)ndjekjen e punës për përgatitjen e materialeve të mbledhjeve, sipas rendit të ditës;
c) njoftimin për zhvillimin e mbledhjeve të këshillit;
ç) shpalljen dhe publikimin e njoftimeve e të akteve të nxjerra nga këshilli bashkiak;
d) përgatitjen e seancave të këshillimit me bashkësinë;
dh) mbikëqyrjen e respektimit të rregullores së funksionimit të këshillit.
3. Sekretari i këshillit bashkiak kryen çdo funksion tjetër që i caktohet nga vetë këshilli