Kryeministri Edi Rama e ka cilësuar si politik dhe aspak profesional raportin e ministrave teknikë për zgjedhjet e 25 qershorit. Ai shprehet se raporti komprometon si një epilog krejt i pavend, gjithçka të mirë u ndërtua në funksion të zgjedhjeve më të mira që Shqipëria ka zhvilluar ndonjëherë.
“Ky raport është një dokument politik, krejt i njëanshëm dhe aspak në nivelin e lartë profesional të Zëvendëskryeministres teknike, si drejtuese e Task Forcës në fjalë” thuhet në deklaratën e Kryeministrisë.
Megjithatë Rama thotë se mirëkupton raportin politik, i cili kishte edhe disa gafa të panevojshme, ndërsa u uron suksese në jetë ministrave teknikë.
“Duke u shprehur mirëkuptimin e tij të plotë, qoftë për disa gafa të bujshme e krejt të panevojshme pas zgjedhjeve në sektorin e arsimit, qoftë për mbytjen në fund fare në lugën e ujit të politikës, prej ku ka dalë edhe raporti i njëanshëm, joteknik e joprofesional i Task Forcës, Kryeministri Edi Rama u uron zonjave e zotërinjve të dorëhequr, shëndet e suksese të mëtejshme në jetë” thuhet në njoftimin e Kryeministrisë. /shqiptarja.com/
