Merkatoja e Vllaznise, ja kush pritet te vije pas Edon Hasanit…

Ka mjaftuar afrimi i Edon Hasanit te Vllaznia, që në kampin shkodran të rikthehet optimizmi dhe të funksionojnë mekanizmat për prurjet e reja. Pas ish-mesfushorit të Kukësit, në klubin kuqeblu po presin përgjigjen përfundimtare nga Gilman Lika. Gjithashtu drejtuesit dhe stafi po punojnë maksimalisht për arritjen e marrëveshjeve për rinovimin e disa lojtarëve të rëndësishëm. Disa prej tyre janë duke kryer bisedimet përfundimtare për të vazhduar “martesën” me shkodranët.
GILMAN LIKA
Pas Edon Hasanit, një tjetër lojtar shkodran pritet që t’i thotë po Vllaznisë dhe të bëjë rikthimin në kampin kuqeblu. Lika ka qenë në fokusin e drejtuesve prej disa kohësh, ndërkohë që ai vetë ka pasur oferta të tjera për të ardhmen e tij. Ende nuk ka vendosur se ku do të shkojë, por sigurisht që ka marrë seriozisht edhe ofertën që i është bërë nga skuadra e Vllaznisë.
Madje, gjatë këtyre ditëve është parashikuar edhe një takim apo bisedime intensive për t’i dhënë zgjidhje çështjes në fjalë. Asnjë nga palët nuk ka thënë se deri në çfarë pike kanë avancuar bisedimet, por këtë javë do të vendoset gjithçka. Një afrim i tillë do të ishte zgjidhja më e mirë për drejtuesit e ekipit, jo vetëm për krahët e mesfushës, por edhe për të qenë një nga sulmuesit e mundshëm në sezonin e ardhshëm.
AFRIMET E TJERA
Drejtuesit e klubit do të vijojnë punën për gjetjen e disa lojtarëve të tjerë për të forcuar Vllazninë për vitin që vjen. Po mësohet se kërkimet po vazhdojnë për të gjitha repartet për të bërë të lumtur trajnerin Cungu. Nëse arrihet marrëveshja me Likën dhe me transferimin e Hasanit, mund të thuhet se merkatoja në repartin e mesfushës ka përfunduar.
Në portë dhe në mbrojtje, duket se Vllaznia ka mjaftueshëm alternativa për të përballuar edhe sezonin e ardhshëm dhe gjatë kësaj kohe pritet që të afrohet ndonjë lojtar për repartin e avancuar. Përpara disa javësh u diskutua se situata të Vllaznia është kaotike dhe nuk ka vend për optimizëm, por duket se gjithçka është rikthyer në normalitet. Pavarësisht largimeve të rëndësishme, duket se drejtuesit dhe trajneri janë optimistë për plotësimin e grupit me elementë cilësorë./panoramasport/