Kryetarja e Lëvizjes Socialiste për Integrim, Monika Kryemadhi tha se nuk heq asnjë presje nga deklaratat e ambasadorit amerikan Donald Lu, në lidhje me klanet kriminale, duke shtuar LSI-ja e ka artikuluar këtë shqetësim prej dy vitesh, por nuk është dëgjuar.
Kryemadhi e ftuar në “360Gradë” në OraNews: Nuk dua t’i heq asnjë pikë dhe asnjë presje dhe as nuk dua t’i shtojë ndonjë fjali asaj që tha ambasadori. Është pse është pak e vonë. Sepse këtë që thotë ambasadori e kemi artikuluar gati dy vjet. Ne tashmë na janë kthyer kriminelët në policët dhe policët në kriminelë.
Gjatë gjithë kësaj kohe kishim reklamë që mediat i bënin reklamë policisë për rripin në makinë, por gjithë kjo kamuflonte kapjen e strukturave të policisë së shtetit dhe shpërthimi i tyre i jashtëzakonshëm ndodhi gjatë zgjedhjeve ku kriminelët ushtronin presion në shtëpitë e njerëzve do të marrësh paratë apo plumbin dhe dy metra më tej, ishte makina e policisë që bënte presion psikologjik që mos merr guximin të denoncosh për këtë person që kërcënon.
Nuk mund të them se me deklarata mund të luftosh krimin. Ambasadori tha se paratë e krimit do të blejnë prokurorin dhe gjyqtarin, por unë them se edhe do ta vrasi prokurorin dhe gjyqtarin.
Moderatori Artur Zheji: Ti thua se ofensiva e krimit mund të shkojë deri në vrasjen e gjyqtarit dhe prokurorit?
Kryemadhi: Pse pak kanë vrarë. Pak janë vrarë njerëz. Nuk mund të marrim gjithë listën, por shumë njerëz janë vrarë dhe nuk gjendet arsye ose vrasësi. Unë shpresoj që policia e shtetit duhet të bëjë një ringritje, apo rilindje në qoftë se do të ketë dëshirën për ta bërë. Është skeptike si ide, por shpresa vdes e fundit.
Duke pasur parasysh edhe ambasadorët kanë filluar të zgjohen, sepse krimi i organizuar shqiptar nuk diskuton më për të kontrolluar territoret e Shqipërisë, por diskuton për të kontrolluar territoret jashtë Shqipërisë gjë që i ka bërë edhe ndërkombëtarët të zgjohen. Deri dje kur LSI e artikulonte çështjen e krimit, ndërkombëtarët nënqeshnin.
