Grupi i Alibeajt ka zbuluar dy kandidatë të tjera për kryetarë bashkie në kuadër të zgjedhjeve lokale të 14 majit. Këtë herë bëhet fjalë për bashkinë e Vaut të Dejës dhe për Patosin, ku do të kandidojnë dy gra.
Klomentina Drini është kandidatja që do të përfaqësojë grupin e Alibeajt për Vaun e Dejës, ndërsa gjatë viteve të fundit ka qenë ne pozicione të larta drejtimi në fushën e administrimit në biznese private por dhe në administratën lokale.
“Ajo ka lindur dhe jeton së bashku me bashkëshortin dhe vajzën në Vaun e Dejës. Drini ka përfunduar studimet e larta në degën e informatikës ndërsa ka marrë titullin master profesionale për degën administrim biznes.
Gjatë viteve të fundit zonja Drini ka qenë ne pozicione të larta drejtimi në fushen e administrimit në biznese private por dhe në administratën lokale”, thuhet në njoftimin për mediat.
Ndërkohë, për Patosin garon Pranvera Rizai. Kjo e fundit është anëtare themeluese e degës së PD në Patos dhe njihet për kontributin e saj edhe si anëtare e këshillit bashkiak, ndërsa aktualisht është mësuese.
