Takimi i Taulant Xhakës dhe trajnerit të ri të Kombëtares Kristian Panuçi është bërë çështje e momentit. Deri tani janë dy versione. Njëri është se Panuçi e ka pritur 3 orë te Bazeli, por ky e ka refuzuar, dhe versioni tjetër është Xhaka i cili hedh poshtë këto zëra. Për të hedhur më shumë dritë mbi ngjarjen, gazeta ‘Panorama Sport’ ka kontaktuar dje me zyrën për shtyp të Federatës Shqiptare të Futbollit në lidhje me refuzimin e Xhakës për të takuar trajnerin që kishte udhëtuar drejt Zvicrës.
Në FSHF kanë bërë me dije që trajneri do të flasë publikisht në konferencën për shtyp përpara grumbullimit të kuqezinjve për dy ndeshjet e radhës kualifikuese. “Trajneri do të japë çdo lloj sqarimi për listën e te grumbulluarve vetëm në 28 gusht në konferencën për shtyp përpara grumbullimit të ekipit kombëtar”, ka reaguar zyra për shtyp e FSHF-së.
Pavarësisht të vërtetës, ajo që bie në sy është fakti se trajneri i ri i kombëtares, Kristian Panuçi është njohur që në fillimet e tij te ekipi shqiptar me problemet e para. Si duket e ka kuptuar që ky rrugëtim nuk është aspak i lehtë.
