Sot i është dhënë lamtumira e fundit Aleksandër Ndokës, vëllait të ish-deputetit të Partisë Socialiste, Arben Ndoka, i cili u ekzekutua me armë zjarri, teksa po hynte në banesën e tij në lagjen “Nëne Tereza” të qytetit të Lezhës. Në ceremoninë mortorë kanë marrë pjesë mijëra njerëz, miq të afërm dhe bashkëpunëtor të Ndokës, ndërkohë që të pranishëm ishin dhe aktor të politikës lokale. Në ceremoninë mortore ishte dhe djali i të ndjerit, Samuel Ndoka, pasi Drejtoria e Burgjeve i kishte dhënë leje për të marrë pjesë në varrimin e të atit.
Ai është sjellë nga dy furgona policie, ndërsa ishte në vëzhgim nga efektivët gjatë gjithë ceremonisë. Gjithçka ka kaluar në heshtje, ndërsa familjaret dhe të afërmit ju kanë qëndruar larg medieve, duke mos folur asnjë fjalë për vrasjen e 48-vjeçarit Aleksander Ndoka. Nga ana tjetër, Policia e Lezhës së bashku me specialistë të ardhur nga Drejtoria e Policisë së Shtetit po vijojnë hetimet në lidhje me ekzekutimin mafioz të 48-vjeçarit Ndoka. Policia po heton në tri pista, duke nisur që nga funksioni i Ndokës në disa detyra shtetërore e deri te konfliktet e të birit.
Informacionet e policisë janë të rezervuara, ndërkohë që pas ceremonisë mortore pritet të merren në pyetje familjarët e viktimës. Dëshmia e tyre do të jetë mjaft me interes, për të përcaktuar pistën kryesore të hetimit me qëllim për të rënë në gjurmët e autorëve të kësaj ngjarjeje që tronditi Lezhën dhe mbarë opinionin publik. Nga veprimet në vendin e ngjarjes rezulton që autorët të kenë qenë vrasës profesionistë, pasi kanë lënë shumë pak gjurmë, ndërkohë që nuk përjashtohet mundësia që të kenë qenë vrasës me pagesë.
